Իրանա-ադրբեջանական սահմանին իրականացվող զորավարժությունները որոշակի ուղերձներ են պարունակում ոչ միայն Ադրբեջանի, այլ նաև Թուրքիայի համար։ Sputnik Արմենիայի հետ զրույցում նման կարծիք հայտնեց իրանագետ Արտյոմ Տոնոյանը։
Նրա խոսքով` Գորիս-Կապան միջպետական ճանապարհին` Որոտանի հատվածում, ադրբեջանցիների կողմից իրանցի վարորդների ձերբակալումը, բեռնատարների ու վարորդների փաստաթղթերի ստուգումը, ճանապարհի փակումը թեև իրականացվում է Ադրբեջանի ձեռամբ, սակայն կատարվածի մեջ իր ուրույն տեղն ունի նաև թուրքական մասնակցությունը։
"Զորավարժությունների սիմվոլիկան` այն, ինչ գրված է ռազմատեխնիկայի վրա, ունի հակաիսրայելական բովանդակություն, բայց անգամ այդ սիմվոլիկան, այդ խորհրդանշական պատկերները որոշակի ուղերձ են նաև Թուրքիային և Ադրբեջանին, քանի որ Իսրայելն Իրանի դեմ հետախուզական գործողություններ իրականացնելու համար հաճախ օգտագործում է Ադրբեջանի տարածքը։
Ըստ իրանագետի` վերջին դեպքերը իրանական կողմի կոշտ գնահատականին չարժանացան, քանի որ դրանք տեղի էին ունեցել այսպես կոչված վիճելի տարածքում, սակայն Տոնոյանը համոզված է`իրանական արձագանքը երկար սպասեցնել չի տա։ Հաշվի առնելով իրանական արտաքին քաղաքականության նրբությունները` կարելի է ասել, որ իրադարձությունները դեռևս առջևում են։
Գորիս-Կապան ճանապարհին գրանցված դեպքերը, սակայն իրանա-ադրբեջանական հարաբերությունների սրման միակ պատճառը չեն։ Տոնոյանի խոսքով` դրանք լարված էին նաև մինչև այդ։
Հիշեցնենք, որ Военный обозреватель (ռազմական մեկնաբան) տելեգրամյան ալիքը նախօրեին գրել էր, որ Իրանի զինված ուժերը զգալի կենդանի ուժ ու տեխնիկա են տեղափոխում Ադրբեջանի հետ սահման, որտեղ լայնածավալ զորավարժություններ են նախատեսված Արաքս գետի հովտում: