ԵՐԵՎԱՆ, 20 սեպտեմբերի - Sputnik. Մետրոպոլիտենի զարգացումը, արևային էլեկտրակայանների և գյուղատնտեսական ձեռնարկությունների կառուցումը կարող են դառնալ հայ-ռուսական համագործակցության առաջիկա զարգացման հիմնական ուղղությունները: Երևանում ընթացող հայ–ռուսական գործարար համաժողովի ընթացքում հայտարարեց Ռուսական արտահանման կենտրոնի գլխավոր տնօրեն Վերոնիկա Նիկիշինան։
«Մենք պատրաստ ենք մեր ավտոբուսներն առաջարկել Երևանին: Մեր նախագծման և շինարարության կոնսորցիումը` «Մետրոգիպրոտրանսը» (Մետրոպոլիտենի և տրանսպորտային կառույցների շինարարության պետական նախագծահետախուզական ինստիտուտ) և ԻԲՏ–ն, մասնակցում են երևանյան մետրոյի նոր ուղիների նախագծման մրցույթին, բայց մենք պատրաստ ենք առաջարկել մեր բոլոր հնարավորությունները ոչ միայն նախագծման ոլորտում, այլև մետրոյի նոր գծերի կառուցման», - ասաց Նիկիշինան՝ հավելելով, որ ռուսական կողմը կարող է նաև նոր գնացքներ առաջարկել մետրոյի համար։
Ռուսական արտահանման կենտրոնը, նրա խոսքով, աշխատում է նաև փոքր հզորությամբ արեւային էլեկտրակայանների արտադրության ու արտահանման շուկաներում:
«Հաշվի առնելով Հայաստանի կլիմայական առանձնահատկությունները՝ մենք կարծում ենք, որ նման նախագծերը, բնականաբար, կարող են իրականացվել նաև այստեղ», - ասաց նա:
Համագործակցության մյուս հնարավոր ուղղությունը, ըստ նրա, համատեղ ձեռնարկությունների ստեղծումն է գյուղմթերքների աճեցման, վերամշակման, փաթեթավորման և արտահանման նպատակով: