Հանուն լավ ապագայի. Գյումրիում ՌԴ քաղաքացիները քվեարկում են Պետդումայի ընտրություններին

ԵՐԵՎԱՆ, 19 սեպտեմբերի – Sputnik, Արմենուհի Մխոյան. Այսօր առավոտ վաղ, ինչպես նախատեսված է ընտրական օրենսգրքով, Գյումրիում` ՌԴ հյուպատոսության տարածքում գտնվող թիվ 8031 ընտրատեղամասում մեկնարկել են Ռուսաստանի Դաշնության ութերորդ գումարման Դաշնային ժողովի Պետական դումայի ընտրությունները:

Գյումրիում իրենց քաղաքացիական պարտքն են կատարում Շիրակի ու Լոռու մարզերում ժամանակավոր գտնվող ՌԴ քաղաքացիները: ՌԴ քաղաքացի Արտուշ Սահակյանն առաջիններից էր, որ տեղամասը բացվելուն պես շտապել էր իր քաղաքացիական պարտքը կատարել:

«Սիզրանում եմ բնակվում, հիմա Հայաստանում հյուր եմ եկել թոռնիկներիս ու չէի կարող չգալ ու չմասնակցել ընտրություններին: Կատարել եմ ընտրություն հանուն ՌԴ պայծառ ապագայի»,-նշեց 80-ամյա Արտուշ Սահակյանը:

ՌԴ շատ քաղաքացիներ Գյումրիում են աշխատանքի բերումով:»"Իրկուտսկի բնակիչ եմ ու այս պահին աշխատում եմ ավիաբազայում: Շուտով վերադառնալու եմ հայրենիք ու շատ լավ է, որ կա այս հնարավորությունը՝ Հայաստանում իմ՝ ՌԴ քաղաքացու պարտքս կատարելու: Ի վերջո, սա մեր երեխաների ապագան է: Ինչպիսի ընտրություն կատարենք, այդպես էլ մեր երեխաները կապրեն:Հուսամ`ամեն ինչ լավ կլինի»,-նշեց Նիկոլայ Շիպիլովը:

Հայաստանում գործող 6 ընտրատեղամասերից4-ը գտնվում են Շիրակի մարզում՝ որից մեկը՝ ՌԴ գլխավոր հյուպատոսարանում և երեքը՝ ռուսական 102-րդ ռազմական բազայում։

«Հեռավար ուղեկալների համար գործել են նաև շրջիկ հանձնաժողովներ: Իսկ հյուպատոսարանի տարածքում գործող տեղամասը բացվեց այսօր ժամը 8:00-ին: Ամեն ինչ նորմալ ընթանում է։ Գոհ եմ քաղաքացիների մասնակցությունից: Ուրախալի է ՌԴ քաղաքացիների նման վերաբերմունքը իրենց քաղաքացիական պարտքի հանդեպ: Ժամը 11-ի դրությամբ արդեն ավելի քան 100 մարդ քվեարկել էր, վստահ եմ` այդ թիվը օրվա ընթացքում կավելանա »,- Sputnik Արմենիայի հետ զրույցում ասաց ՌԴ գլխավոր հյուպատոս Ռուսլան Կանդաուրովը:

Ի դեպ, համավարակի կանոններից ելնելով, մինչ տեղամաս մտնելը քաղաքացիները ջերմաչափվում են, դնում ձեռնոցներ ու դիմակ, իսկ տեղամասում պահպանում են անհրաժեշտ հեռավորությունը:

Քանի որ համավարակի պատճառով ընտրություններն անցկացվում նաև առցանց տարբերակով, մինչ իրենց քվեաթերթիկները լրացնելը քաղաքացիները ստորագրում էին հայտարարություն, որ այս ընթացքում այլ տեղամասում կամ առցանց ընտրությունների չեն մասնակցել։