ԵՐԵՎԱՆ, 17 սեպտեմբերի – Sputnik. Աշխատանքային այցով Ֆրանսիայում գտնվող ՀՀ նախագահ Արմեն Սարգսյանը Շամոնիում այսօր մասնակցել է ամենամյա "Մտքերի գագաթնաժողովի" (Summit of Minds) բացմանը և հանդես եկել որպես գլխավոր բանախոս։ Տեղեկությունը հայտնում են նախագահի մամուլի ծառայությունից։
Նախագահ Սարգսյանն իր խոսքում մասնավորապես անդրադարձել է Արցախի դեմ Ադրբեջանի սանձազերծած 44-օրյա պատերազմին և հայկական բանակի զինվորների խիզախությանը: "44 օր տևած պատերազմը միայն Ադրբեջանի դեմ չէր, քանի որ այդ երկիրը Թուրքիայի բացահայտ աջակցությամբ էր պատերազմում՝ նրա անօդաչու սարքերով, տեխնիկայով և այլն",- իր խոսքում ասել է նախագահ Սարգսյանը:
Նա նշել է, որ երբ պատերազմի ընթացքում և դրանից հետո զոհվածների պարգևատրման հրամանագրերի ստորագրումն արդեն իսկ ծանր էր, քանի որ յուրաքանչյուրի հետևում հերթական խզված երիտասարդ կյանքն էր ու այն ամենի նկարագրությունը, ինչ տեղի էր ունեցել այդ երիտասարդների հետ: "Նրանք մոտ 20 տարեկան էին և հերոսաբար պաշտպանել են իրենց հայրենիքը՝ կռվելով իրենց "Գողիաթի" դեմ":
Շարունակելով համարձակության ու խիզախության թեման՝ նախագահ Սարգսյանը նշել է, որ ճշմարտությունն ընդունելն ու ասելը ևս խիզախություն է պահանջում. "Ամբողջ աշխարհում շատ խնդիրներ ունենք, որովհետևքաղաքական գործիչները, կազմակերպությունները, անհատները, գործարարները, մշակութային գործիչներն ազնիվ չեն: Մեր կյանքում՝ և՛ անձնական, և՛ քաղաքական, տեսնում ենք, որ շատերը ձևացնում են՝ ազնիվ լինելու և չստելու փոխարեն: Վախը հաղթահարելու և քաջ լինելու համար պետք է չստել, առաջին հերթին՝ չխաբել ինքդ քեզ: Փոխարենը՝ պետք է առերեսվել իրողության հետ և գործել":
Արմեն Սարգսյանը քննարկման մասնակիցներին հրավիրել է մասնակցելու այս տարվա հոկտեմբերի 23-24-ը Հայաստանում՝ Դիլիջանում նախատեսված՝ "Մտքերի հայկական երրորդ գագաթնաժողովին":
Նշենք, որ Շամոնիի գագաթնաժողովը յուրօրինակ հարթակ է նոր գաղափարների, նոր նախագծերի փոխանակման համար:
Այս անգամ տարբեր երկրների շուրջ 100 ներկայացուցիչ բազմակողմ քննարկում են ծավալել ժամանակակից աշխարհի մարտահրավերների ու խնդիրների, այս համատեքստում՝ համարձակության ու խիզախության մասին՝ իրենց տարբեր դրսևորումներով: