ԵՐԵՎԱՆ, 17 սեպտեմբերի – Sputnik. Վերջին շրջանում անտառխախտումների դեպքերի արձանագրման թվի աճ է գրանցվել։ Անտառապետությունների ու անտառտնտեսությունների շուրջ 100 ներկայացուցիչների հետ հանդիպման ժամանակ այս մասին ասել է ՀՀ շրջակա միջավայրի նախարար Ռոմանոս Պետրոսյանը, տեղեկանում ենք նախարարության կայքից։
Պետրոսյանը նշել է, որ անտառխախտումների դեպքերի աճի պատճառներից մեկն էլ այն է, որ նախորդ շրջաններում ոչ բոլոր դեպքերն են արձանագրվել կամ փոխանցվել իրավապահ մարմիններին։
«Այսօր կա դրված հստակ պահանջ՝ անտառխախտման ցանկացած դեպք պետք է արձանագրվի և արժանանա իրավապահ համակարգի և տեսչական մարմինների գնահատականին։ Անտառապետերն ու անտառապահերը պետք է այս պայքարում կանգնեն մեր կողքին։ Անհանդուրժող ենք լինելու անտառը սեփական բիզնեսի վերածողների հանդեպ»,–ասել է Պետրոսյանը։
Նրա խոսքով` Հայաստանում անտառը չի կարող ծառայել անհատների նեղ անձնական շահերին։
Ի դեպ, ընթացիկ տարում ամենաքիչ անտառխախտման դեպքերը գրանցվել են «Ստեփանավանի», «Սևքարի» և «Կապանի» անտառտնտեսություններում, իսկ «Թումանյանի», «Հրազդանի» և «Արծվաբերդի» անտառտնտեսություններում՝ ամենաշատը։
Հիշեցնենք, որ օգոստոսի 14-ին ողբերգական դեպք էր տեղի ունեցել Լոռիում. «Ֆորդ» մակնիշի ավտոմեքենան, որն ապօրինի փայտանյութով էր լեցուն, անտառից ընթացել է դեպի գյուղ։
Ոստիկանները կանգնեցրել էին մեքենան, սակայն վարորդը, շարունակելով ընթացքը, Լորուտ գյուղի մոտակայքում դուրս էր եկել ճանապարհի բանուկ մասից և շրջվել ձորը:
Մեքենայում գտնվող երկու մարդ մահացել են, որից հետո մի խումբ անձինք դեպքի վայր ժամանած ոստիկաններին են ծեծել, հրդեհել նրանց մեքենան։
Դեպքի առթիվ քրգործ է հարուցվել, կան կալանավորվածներ։