ՀՀ ԱԱԾ–ն իրանական բեռնատարների համար ժամանակավորապես փակել է Գորիս–Կապան ճանապարհը

Ոստիկանության և ԱԱԾ աշխատակիցներն իրանական բեռնատարների վարորդներին առաջարկում են օգտվել շրջանցիկ ճանապարհից։
Sputnik
ԵՐԵՎԱՆ, 16 սեպտեմբերի – Sputnik. Գորիսի ելքի մոտ տասնյակ բեռնատարներ են կուտակվել, որոնց թույլ չեն տալիս անցնել Կապանի կողմ։ ՀՀ ԱԱԾ–ն իրանական բեռնատարների համար ժամանակավորապես փակել է Գորիս–Կապան ճանապարհը:
Վարորդների մեծ մասն ադրբեջանցիներին վճարելու գումար չունի. Որոտանից քիչ հեռու գտնվող ադրբեջանական անցակետում նրանցից 100-300 դոլար են պահանջում։
Վարորդներից շատերը Գորիսի ուղղությամբ շարժվելիս չեն վճարել ադրբեջանցիներին, բայց նրանց զգուշացրել են, որ վերադառնալիս կրկնակի գումար են տալու։
Իրանական բեռնատարները` մեծ խնդրի փոքր մաս. ինչո՞ւ են Անկարան ու Բաքուն նոր պատերազմ ուզում
Վարորդների խոսքով` ոստիկանությունն ու ԱԱԾ–ն առաջարկում են շրջանցել այդ ճանապարհը։ Բայց մեքենաները մեծ են և չեն կարողանա անցնել նեղ ճանապարհով։ Մի քանի մեքենա նման փորձ կատարելիս արդեն իսկ վթարի են ենթարկվել։
Պետք է գոհ լինենք, որ հայկական մեքենաներից ադրբեջանցիները տուրք չեն վերցնում. Ղազարյան
«Ադրբեջանցիներն ինձ կանգնեցրին ու 260 դոլար ուզեցին գնալու ու հետդարձի համար։ Դոլար չունեի, ասեցի` դրամ տամ, ասացին` դրամն ի՞նչ է, դոլար տուր կամ մանաթ։ Մեկին ասել են` 50 դոլար տուր։ Նայած, թե ով ինչ բեռ է փոխադրում։ Հայկական ոստիկանությունը մեզ ասում է` այդ ճանապարհով մի անցեք, Տաթևով եկեք, բայց ախր այդ ճանապարհն էլ շատ վատն է, արդեն մի քանի մեքենաների մասեր կոտրվել են»,– Sputnik Արմենիային ասաց իրանցի վարորդներից մեկը, որի անունը Նադիր է։
Վարորդներին ամենայն հավանականությամբ թույլ չեն տալիս դեպի Կապան գնալ, որպեսզի գումարի պատճառով ի հայտ եկող խնդիրների չբախվեն։
Sputnik Արմենիայի նկարահանող խումբն արձանագրեց, որ Կապանի կողմից բեռնատարներ եկան, որոնք 130–ական դոլար էին վճարել։
Ստուգել են, բաց թողել. ադրբեջանցիներն արդեն նաև հայ վարորդների բեռնատարներն են ստուգում