ԵՐԵՎԱՆ, 14 սեպտեմբերի – Sputnik. Ծառայության ընթացքում հիվանդություն ձեռք բերած նախկին զինծառայողները չեն օգտվում անվճար բուժօգնությունից: Նման հայտարարություն է արել ՀՀ մարդու իրավունքների պաշտպան Արման Թաթոյանը` հավելելով, որ բողոքներ է ստացել այդ առնչությամբ։
Թաթոյանն ուսումնասիրել է խնդիրը և պարզել` անվճար բուժօգնությունից չեն օգտվում մի շարք զինվորներ։
Այսպիսով, անվճար բուժօգնությունից չեն օգտվում պարտադիր ժամկետային ծառայություն անցած այն քաղաքացիները, որոնք ծառայության ընթացքում ձեռք են բերել հիվանդություն, որը հիմք չի հանդիսացել նրանց ոչ պիտանի ճանաչելու համար, սակայն զորացրվել են ժամկետը լրանալու կապակցությամբ։
Բացի այդ, անվճար բուժօգնությունից չեն օգտվում նաև պարտադիր ժամկետային ծառայություն անցած այն քաղաքացիները, որոնց ծառայության ընթացքում ցուցվել է բժշկական օգնություն, սակայն ծառայության ընթացքում այն չի իրականացվել։
Անվճար բուժում չեն ստանում նաև ծառայության ընթացքում ստացած խեղման, վնասվածքի, հիվանդության պատճառով զորացրված այն անձինք, որոնք հաշմանդամության կարգ չունեն, ինչպես նաև այն պայմանագրային զինվորները, որոնք ծառայությունից արձակվել են կադրերի տրամադրության տակ գտնվելու ժամկետը լրանալու կապակցությամբ, սակայն հիվանդությունը ձեռք են բերել ծառայության ընթացքում:
ՀՀ ՄԻՊ–ը նաև ստեղծված իրավիճակից դուրս գալու ելքեր է առաջարկել։ Մասնավորապես, նրա դիրքորոշմամբ՝ հարցի ամբողջական լուծման համար անհրաժեշտ է օրենսդրական հստակ կարգավորումներ կատարել և վերոհիշյալ զինծառայողներին, որոնք այժմ անվճար բուժօգնությունից չեն օգտվում, տրամադրել այն։
Գործող օրենսդրության պատճառով մարդիկ անընդհատ խոչընդոտների առաջ են կանգնում: Մարդու իրավունքների պաշտպանն առաջարկներ կուղարկի ԱԺ պաշտպանության և անվտանգության հարցերի մշտական հանձնաժողով, այդ թվում ոլորտային հանձնաժողովներ և խմբակցություններ, ինչպես նաև պաշտպանության և արդարադատության նախարարություններ։
Հիշեցնենք` առողջապահության նախարարությունից ավելի վաղ Sputnik Արմենիային հայտնել էին, որ որոշ բուժհաստատություններում պատպատվերի տեղերը սպառվել են։