ԵՐԵՎԱՆ, 12 սեպտեմբերի – Sputnik. Ատամի ցավը ոչ միայն անտանելի է և պահանջում է մասնագետի միջամտություն, այլ նաև կարող է վկայել բավական լուրջ առողջական խնդիրների մասին, որոնք անտեսելը վտանգավոր է:
Սակայն լինում են դեպքեր, երբ բժշկին դիմելու հնարավորությունն այդ պահին չկա, իսկ ցավից հարկավոր է հնարավորինս արագ ազատվել։ The Health Site պարբերականը ներկայացնում է առաջին բուժօգնության միջոցներ, որոնք մինչ մասնագետին դիմելը որոշ ժամանակով կմեղմեն սաստիկ ցավը:
Ցավազրկող դեղամիջոցներ
Ցավազրկող դեղամիջոցները որոշ դեպքերում բավական արդյունավետ են լինում, ուստի սաստիկ ցավը մեղմելու համար կարելի է առաջին հերթին նման որևէ դեղամիջոց ընդունել: Արդյունավետ կարող է լինել պարացետամոլը, սակայն ցանկալի է օգտագործել դիկլոֆենակ պարունակող դեղամիջոցները, որոնք շատ ավելի արդյունավետ են ատամի ցավի դեմ պայքարում:
Մեխակի յուղ
Ատամի ցավի դեմ արդյունավետ բնական միջոց է մեխակի յուղը, ուստի ցավը մեղմելու համար կարելի է նաև մեխակի յուղով թրջված բամբակ դնել ախտահարված ատամին: Այս միջոցն անչափ արդյունավետ է անգամ իմաստության ատամի ցավի դեպքում:
Սառույցով կոմպրես
Դեմքի կամ ատամների տրավմաների, այտուցների կամ արյունահոսությունների դեպքում անչափ արդյունավետ են սառույցով կոմպրեսները։ Դրանք ոչ միայն մեղմում են ցավը, այլև նվազեցնում են բորբոքումների մակարդակը:
Աղաջրով ողողումներ
Աղաջրով ողողումները նման դեպերում տեղին են: Պարզապես հարկավոր է աղը լուծել գոլ ջրի մեջ ու կիրառել ողողումների համար:
Ատամները մաքրելու համար նախատեսված թել
Շատ հաճախ ատամի ցավը պայմանավորված է լինում ատամների միջև սննդի մնացորդների կուտակմամբ, իսկ դրանցից ազատվելու լավագույն միջոցները հատուկ սարքերի կամ հասարակ ատամի թելի գործածությունն է: