ԵՐԵՎԱՆ, 10 սեպտեմբերի -Sputnik. Ամենայն Հայոց Կաթողիկոս Գարեգին Բ-ն այսօր Մայր աթոռ սուրբ Էջմիածնում ընդունեց Արցախի Հանրապետության Արտաքին գործերի նախարար Դավիթ Բաբայանին և Արցախի թեմի առաջնորդ Գերաշնորհ Տ. Վրթանես եպիսկոպոս Աբրահամյանին։ Տեղեկությունը հայտնում են Մայր աթոռի տեղեկատվական համակարգից։
Католикос Гарегин Второй принял министра иностранных дел Карабаха Давида Бабаяна (10 сентября 2021). Эчмиадзин
Նորին Սրբությունը բարձր գնահատեց նախարարի Մայր Աթոռ սուրբ Էջմիածնում տեղի ունեցող միջազգային համաժողովին մասնակցությունը, որով հնարավորություն է ընձեռնվում ժողովականներին համապարփակ ներկայացնելու Արցախի առջև ծառացած ներկայիս մարտահրավերները և հիմնախնդիրը։
Վեհափառը նախարարին տեղեկացրեց, որ այս շրջանում քույր եկեղեցիների ներկայացուցիչները ևս համապատասխան աշխատանքներ են իրականացրել միջազգային ատյաններում բարձրաձայնելու Ադրբեջանի ոտնձգություններն Արցախի և Հայաստանի Հանրապետության դեմ։
Նախարար Դավիթ Բաբայանն իր խոսքում ընդգծեց, որ Արցախը մշտապես զգացել է Հայ Առաքելական սուրբ եկեղեցու աջակցությունը և մեծապես կարևորել ու գնահատել այն։ Վերջինս նաև ընդգծեց նման համաժողովների կազմակերպման կարևորությունը, որոնց միջոցով հնարավոր է Արցախն առավել ճանաչելի դարձնել միջազգային տարբեր հարթակներում։
Ինչպես արդեն հայտնել էինք, Մայր աթոռի արխիվը «Միջազգային կրոնական ազատություն և խաղաղություն» համաժողովի շրջանակում կազմակերպել է արխիվային վավերագրերի և լուսանկարների ցուցահանդես, որի հեղինակը և համադրողը Տ. Ասողիկ աբեղա Կարապետյանն է: