ՀՀ ոստիկանության զորքերի հրամանատար Հայկ Բաբայանը, ճանապարհային ոստիկանության պետ Եգոր Կարապետյանն ու տեղակալ Նորիկ Սարգսյանն այցելել են հանրապետության հյուսիսարևելյան մարտական դիրքեր։ Տեղեկությունը հայտնում է ոստիկանությունը` հավելելով, որ այնտեղ մարտական ծառայություն են իրականացնում ոստիկանության զորքերի ծառայողները։
«Ճանապարհային ոստիկանության կողմից մարտական դիրքերում տեղադրվել են արևային էներգիա արտադրող պանելներ ու մարտկոցներ, իսկ հերթապահություն իրականացնող ոստիկաններին հանձնել են առաջին անհրաժեշտության պարագաներ»,–նշված է հաղորդագրության մեջ։
Զորամասի հրամանատարության ուղեկցությամբ ոստիկանության զորքերի հրամանատարությունն ու ճանապարհային ոստիկանության ղեկավարությունը շրջել են դիրքերում, ծանոթացել մարտական հերթապահության առանձնահատկություններին, զրուցել սահմանապահ ոստիկանների հետ։
Ոստիկանության զորքերի հրամանատար Հայկ Բաբայանը շնորհակալություն է հայտնել ճանապարհային ոստիկանության անձնակազմին՝ դիրքապահ ոստիկանների կողքին լինելու համար։