ԵՐԵՎԱՆ, 8 սեպտեմբերի – Sputnik. ՀՀ պետական վերահսկողական ծառայության ղեկավարի տեղակալ Ռաֆայել Զաքարյանն աշխատանքից ազատվելու դիմում է գրել: Նա Facebook–ի իր էջում գրառում է արել` հայտնելով, որ այսօր արդեն դիմում է ներկայացրել ՀՀ վարչապետ Նիկոլ Փաշինյանին։
«Շնորհակալություն եմ հայտնում Նիկոլ Փաշինյանին ավելի քան 2.5 տարի այս պատասխանատու պաշտոնն ինձ վստահելու համար, քանզի այս պաշտոնում նշանակվել եմ ծառայության ձևավորման սկզբնական շրջանում։ Ժամանակահատված, երբ անհրաժեշտ էր սեղմ ժամկետներում կազմավորել պրոֆեսիոնալ աշխատանքային միջավայր և արդյունավետորեն իրացնել ու ապահովել Սահմանադրությամբ և օրենքներով Վարչապետին վերապահված վերահսկողական լիազորությունները»,–գրել է նա։
Զաքարյանը շնորհակալություն է հայտնել նաև ծառայության նախկին ղեկավար Արգիշտի Քյարամյանին՝ համատեղ արդյունավետ աշխատանքի։ Նա հավելել է նաև, որ աշխատանքային գործունեությունը շարունակելու է պետական կառավարման համակարգում։
Հիշեցնենք, որ Զաքարյանը 2019-ի փետրվարի 12-ին էր նշանակվել այդ պաշտոնին։