ԵՐԵՎԱՆ, 8 սեպտեմբերի - Sputnik. ՀՀ կառավարության այսօրվա նիստի ժամանակ քննարկվեց Գեղարքունիքի նոր մարզպետի նշանակման հարցը։ Թեկնածուն Ջրային կոմիտեի նախկին նախագահ Կարեն Սարգսյանն էր։ ՀՀ վարչապետ Նիկոլ Փաշինյանը նրան խոսք փոխանցեց։
«Շնորհակալ եմ վստահության համար, ինձ համար մեծ պատիվ է հայրենի մարզում մարզպետ լինելը», – ասաց Սարգսյանը։
Փաշինյանին սա դուր չեկավ, նա հումորով նկատողություն արեց։
«Մեր թեկնածուները մեթոդաբանական սխալներ են գործում։ Ընտրվելուց առաջ արդեն շնորհակալություն եք հայտնում, պարոն Սարգսյան։ Դե որ այդքան վստահ եք, ուզած–չուզած` պետք է ընտրվեք», – ասաց նա։
Կառավարության անդամները քվեարկեցին Սարգսյանի թեկնածության օգտին։
Հիշեցնենք` մինչ այս Գեղարքունքի մարզպետը Գնել Սանոսյանն էր, որ այժմ զբաղեցնում է տարածքային կառավարման և ենթակառուցվածքների նախարարի պաշտոնը։