ԵՐԵՎԱՆ, 5 սեպտեմբերի - Sputnik․ Արցախում ջրի խնդիրը շարունակում է մնալ չլուծված: Տեղումների բացակայության հետևանքով գետերը ցամաքել են, բնակիչների 25-30 տոկոսը մնացել է առանց ջրի: Տեղեկությունը Sputnik Արմենիայի հետ զրույցում ասաց Արցախի «Ջրմուղկոյուղի» ՓԲԸ տնօրեն Գագիկ Պողոսյանը:
«Ստեփանակերտը սնուցող վերգետնյա գետերիից մեկը լրիվ չորացած է, մյուս երկու գետերն այս պահին տալիս են 10 լիտր/վայրկյան ջուր: Իսկ այն գետը, որը մոտ 95-100 լիտր/վայրկյան ջուր էր բաց թողնում, այս պահին 30լիտր/վայրկյան է ջուր գալիս»,- ասաց նա:
Նրա խոսքով՝ արդեն 53 օր է, ինչ Ստեփանակերտում տեղումներ չեն գրանցվել։ Բացի այդ՝ պատերազմից հետո Արցախի մայրաքաղաքում բնակչության թիվն ավելացել է 13-15.000-ով։ Այս օրերին Արցախի «Ջրմուղկոյուղին» ռուս խաղաղապահների օգնությամբ մեքենաներով ջուր են հասցնում Ստեփանակերտի ջրազրկված թաղամասերի բնակիչներին։
«26 պոլիէթիլենային «բաքեր» ենք տեղադրել այդ տարածքներում բազմաբնակարան շենքերի ու սեփական տների մերձակայքում, 24-ժամյա աշխատանքային ռեժիմով այդ բաքերը լիցքավորում ենք, որ բնակչությունը կարողանա այդտեղից ջուր վերցնել»,- նժեց «Ջրմուղկոյուղու» տնօրենը։
Նա նշեց՝ սա այն եզակի դեպքերից է, երբ ադրբեջանցիներին ուղղված մեղադրանքներն անհիմն են: Քաղաքի ջրամատակարարումը 4-5 ժամում կկարգավորվի, եթե օդի ջերմաստիճանը նվազի ու տեղումներ սկսվեն:
«Նման իրավիճակ 30 տարվա մեջ երբևիցե չի եղել, որ այսքան ժամանակ անձրևներ չլինեն: Սա ընդհանուր անոմալիա է, ընդհանուր տաքացումների հետ է կապված: Մեր օդերևութաբանների կանխատեսումներով՝ 2020-21 թթ. տեղումները պետք է լիներ մոտ 400-450 մմ, այս տարի եղել է 200 մմ, այսինքն` 250 մմ-ով նվազել է տեղումների քանակը, իսկ 200 մմ-ն անապատի կլիմային է մոտ»,- հավելեց նա։
Հիշեցնենք, որ Ստեփանակերտում դեռևս օգոստոսից ջրի խնդրի է առաջացել:
Համացանցում տեղեկություններ են շրջանառվում, որ խնդրի պատճառն Ադրբեջանն է, սակայն թե՛ քաղաքային իշխանությունները, թե՛ ոլորտի պատասխանատուները հերքում են այդ տեղեկությունը: