Հայազգի ուրուգվայցի ֆուտբոլիստ Դիեգո Ռոսի Մարաշլյանը հանդես կգա թուրքական «Ֆեներբախչեում»

ԵՐԵՎԱՆ, 2 սեպտեմբերի - Sputnik. 23-ամյա հարձակվող Դիեգո Ռոսի Մարաշլյանը հեռացել է Los Ángeles FC–ից: Երեք մրցաշրջան ամերիկյան թիմում հանդես գալուց հետո օգոստոսի 31-ին նա վայրէջք է կատարել Ստամբուլի օդանավակայանում ՝ թուրքական «Ֆեներբախչեի» հետ պայմանագիր կնքելու համար: Տեղեկությունը հայտնում է diarioarmenia.org-ը։

Տրանսֆերը կատարվել է մեկ տարով:

Ռոսին սկսել է իր կարիերան «Պենյարոլում»: Այնտեղ նա անցկացրել է 36 խաղ և դարձել 10 գոլի հեղինակ:

2017 թվականին Los Ángeles FC-ն նրան ձեռք բերեց 4,5 միլիոն դոլարով: ԱՄՆ -ում Դիեգոն անց է կացրել 113 խաղ և գրանցել 59 գոլ, ինչն էլ թուրքական ամենամեծ ակումբներից մեկի ուշադրությունը գրավեց:

Այս պահին «Ֆեներբախչեն» 9 միավորով երկրի մրցաշարային աղյուսակում երկրորդն է և հանդես կգա ՈւԵՖԱ-ի Եվրոպա լիգայի D խմբու` «Օլիմպիակոսի», Ֆրանկֆուրտի «Այնտրախտի» և բելգիական «Անտվերպենի» հետ միասին:

Ոչ վաղ անցյալում Դիեգո Ռոսի Մարաշլյանին հրավիրել էին Հայաստանի ազգային հավաքական, սակայն նա մերժել էր առաջարկը:

«Առաջարկ ստացել եմ, բայց քանի որ ես ծնվել եմ Ուրուգվայում, ինձ ավելի շատ ուրուգվայցի եմ զգում, քան հայ: Ես միշտ երազել եմ բաց կապույտ շապիկ հագնել: Երախտապարտ եմ , որ նրանք ցանկանում էին ինձ Հայաստանի հավաքական տանել, բայց ես արդեն խոսել եմ նրանց հետ և հասկացրել, որ իմ ցանկությունն է խաղալ Ուրուգվայի հավաքականում»: