ԵՐԵՎԱՆ, 1 սեպտեմբերի – Sputnik. Կինն ու ամուսինն առաջին հերթին պետք է հասկանան իրար, ոչ թե խանգարեն, այլ օգնեն իրականացնել այն գաղափարները, որոնց դուք որոշել եք նվիրել ձեր կյանքը։ Այսպիսի խրատական պատասխան տվեց այսօր ՌԴ ԱԳ նախարար Սերգեյ Լավրովը` պատասխանելով Մոսկվայի միջազգային հարաբերությունների պետական համալսարանի (МГИМО) ուսանողուհու հարցն, թե ինչպիսին պետք է լինի դիվանագետի կինը։
«Որևէ հատուկ բաղադրատոմս չկա»,– ասաց դիվանագետը։ Նա ուսանողներին ներկայացրեց իր աշխատանքային փորձի ընթացքում տեսածը։
«Երբ ես դեռ դեսպան չէի ու որպես կրտսեր, միջին դիվանագետ աշխատում էի տարբեր դեսպանների հետ, տեսնում էի, որ նրանց կանայք տարբեր ոճեր ունեն, այդպես էլ է լինում։ Բայց ցանկացած դեպքում դա օգտակար էր ընդհանուր գործի համար»,– ասաց նա։
ՌԴ ԱԳ նախարարը կարևորեց, որ դիվանագետ ամուսինն էլ հարգի կնոջ մասնագիտությունը։ Ու եթե կինը դիվանագետ ամուսնու հետ մեկնում է գործուղման մի երկիր, որտեղ նրա մասնագիտական կարողությունները չեն կարող իրացվել, դա, ըստ նրա լրջագույն խնդիր է։
«Նման իրավիճակում յուրաքանչյուր ընտանիք ինքն է ընտրում` մեկնել միասին, թե յուրաքանչյուրը պահպանի իր աշխատանքը, բայց փորձել ավելի հաճախ մեկնել իրար մոտ։ Սա կյանք է, և այն ոչ մի կանոնների մեջ չի տեղավորվում»,– ասաց Լավրովը։
Սերգեյ Լավրովի կինը` Մարիա Ալեքսանդրովնա Լավրովան, կրթությամբ բանասեր է, ռուսաց լեզվի և գրականության ուսուցչուհի։ Աշխատել է ՄԱԿ -ում Ռուսաստանի Դաշնության մշտական ներկայացուցչության գրադարանում: