Երեկ կեսօրից այրվում են Գեղարքունիքի մարզի Կութ համայնքի խոտհարքները։ Sputnik Արմենիայի թղթակիցները դեպքի վայրից հայտնում են` գյուղից էլ երևում են հրդեհի ծխացող օջախները։
Տեղի բնակիչներից Հայկ Գալստյանը պատմում է` ողջ գիշեր գնացել-եկել է խոտհարք, որպեսզի տեսնեն կրակն ուր է հասել։ Այժմ էլ նա այնտեղ է` ընկերոջ հետ փորձում է մարել կրակը։ Նրանք նշում են` ադրբեջանցիները դիտավորյալ են հրդեհում իրենց դաշտերը` անիվներ այրելով ու դրանք սարից ներքև գլորելով։
«Երեկ ԱԻՆ ենք զանգել` հրշեջներն եկել են, բայց չեն կարողացել կրակը մինչև վերջ մարել։ Դե, առանց ջրի են եկել, մենակ տպիչներով են եղել։ Այսօր էլ զանգել ենք ԱԻն, մարդու իրավունքների պաշտպանի գրասենյակ, բայց դեռ մարդ չի եկել»,–ասում է Գալստյանը։
Նրա խոսքով` երեկ նաև համագյուղացիներով են փորձել հրդեհը մարել, ինչի հետևանքով որոշներն անգամ վնասվածք են ստացել, բայց կրակը շատ է տարածվել` չի հաջողվել մարել այն։
Գալստյանն ասում է, որ արդեն իսկ 20 հեկտարից ավել տարածք է այրվել, որտեղից խոտհունձը նոր–նոր էին անում և խոտի մեծ մասը դեռ չեն հասցրել քաղել։
«Ես 40-ից ավելի կենդանի ունեմ` ինչո՞վ եմ կերակրելու նրանց, երբ անասնակերը հիմա աչքիս առաջ այրվում է։ Հիմա ումից պետք է աջակցություն ուզենք, մեկ է, ոչինչ չեն տալու։ Սովից կսատկեն կենդանիները` երևի չենք էլ հասցնի ծախել»,–ասում է Կութի բնակիչը։
Այս պահին Գալստյանն ընկերոջ հետ փորձում է մարել հրդեհը ձեռքի տակ եղած միջոցներով` ջուր, բնականաբար, չկա այդ տարածքում։
Հիշեցնենք, որ ԱԻՆ–ն այսօր առավոտյան հայտնել էր` փրկարարներին հաջողվել է մարել Կութ գյուղի տարածքում` հյուսիս-արևելյան և հարավ-արևելյան հատվածներում բռնկված հրդեհը։