ԵՐԵՎԱՆ, 1 սեպտեմբերի – Sputnik. Բանակային խաղերը լուրջ իրադարձություն են դարձել՝ շարունակելով երկրների միջև գործընկերության ավանդույթները։ Այդ մասին Հայաստանում Ռուսաստանի գործերի ժամանակավոր հավատարմատար Ալեքսեյ Սինեգուբովը հայտարարել է Հայաստանում «Բանակային միջազգային խաղեր – 2021-ի» շրջանակներում անցկացվող «Խաղաղության մարտիկ» մրցույթի փակման արարողության ժամանակ։
Սինեգուբովը շնորհավորել է Հայաստանի թիմի հաղթանակը, թեև խոստովանել է, որ ռուսաստանցի զինվորականներին էր երկրպագում։
«Ուզում եմ բոլորին շնորհավորել «Խաղաղության մարտիկ» մրցույթի ավարտի առթիվ։ Ես, որպես Ռուսաստանի ներկայացուցիչ, իմ թիմին էի երկրպագում։ Ավելին, դեսպանատանն ինձ ասում էին, որ մեր թիմը հաղթելու է (ծիծաղում է- խմբ․)։ Բայց ես ի սրտե շնորհավորում եմ եղբայրական հայկական թիմին»,-ասել է նա։
Ռուս դիվանագետը նշել է, որ այդպիսի մրցույթներում պարտվողներ չկան, կան միայն հաղթողներ, քանի որ յուրաքանչյուր թիմ փորձ է փոխանակում մյուսների հետ:
«Բանակային խաղերը ևս մեկ միջոցառում են դարձել մեր երկրների միջև համագործակցության շրջանակներում»,-ասել է Սինեգուբովը:
Նշենք, որ Դիլիջանում կազմակերպված «Խաղաղության մարտիկ» մրցույթի ընդհանուր հաշվարկում առաջին տեղը զբաղեցրել է հայկական թիմը: Ռուս զինվորականները երկրորդ տեղում են։ Իսկ Բելառուսի և Ղազախստանի թիմերը կիսել են մրցաշարային աղյուսակի երրորդ հորիզոնականը։
Հիշեցնենք՝ «Խաղաղության մարտիկը» մեկնարկել է օգոստոսի 19-ին։ Մասնակցում է 6 պետություն՝ Հայաստանը, Ռուսաստանը, Բելառուսը, Ղազախստանը, Հունաստանը և Կատարը։