ԵՐԵՎԱՆ, 31 օգոստոսի - Sputnik. Հայաստանի երկրորդ նախագահ Ռոբերտ Քոչարյանի և նախկին փոխվարչապետ, «Հայաստան» դաշինքի պատգամավոր Արմեն Գևորգյանի գործով դատական նիստը հետաձգվել է` էլեկտրականության բացակայության պատճառով։
«Էլեկտրամատակարարման բացակայության պատճառով լսումները այսօր չեն կայացել։ Դատարանը գտել է, որ նման պայմաններում թղթային տարբերակով արձանագրումը չի ապահովելու պատշաճ հրապարակայնություն», - լրագրողների հետ զրույցում ասել է դատախազ Գևորգ Բաղդասարյանը։
Բաղդասարյանն ասաց, որ եթե լսումները տեղի ունենային, ինքը բարձրացնելու էր Գևորգյանի պաշտպան, փաստաբան Էրիկ Ալեքսանյանի վարքագիծը։ Նախորդ նիստին փաստաբանը լքել էր դահլիճը այն բանից հետո, երբ դատավոր Աննա Դանիբեկյանը հետաձգել էր իր ներկայացված միջնորդության քննարկումը, միջնորդությամբ պաշտպանական կողմը դատավորին ինքնաբացարկ էր հայտնում։ Ալեքսանյանը լքել էր դահլիճը` չնայած դատավորի հայտարարությանը, որ ինքը նրան թույլ չի տալիս հեռանալ։ Հաշվի առնելով փաստաբանի բացակայությունը՝ դատավորը ստիպված է եղել հետաձգել նախորդ նիստը։
Այս անգամ դատական նիստը հետաձգվել է մինչև սեպտեմբերի 7-ը ժամը 13։00։
Նշենք, որ այսօր Ռոբերտ Քոչարյանի ծննդյան օրն է։ Լրանում է նրա 67–ամյակը։
Հիշեցնենք` սկզբում գործով անցնում էին նաև պաշտպանության նախկին նախարար Սեյրան Օհանյանը և ՀԱՊԿ նախկին գլխավոր քարտուղար Յուրի Խաչատուրովը։ ՍԴ-ի կողմից ՔՕ 300.1 հոդվածը Սահմանադրությանը հակասող ճանաչելուց հետո Օհանյանի և Խաչատուրովի մեղադրանքները հանվեցին, քրեական հետապնդումը լիովին դադարեցվեց։
Նույն կերպ դադարեցվեց նշված հոդվածով Քոչարյանի և Գևորգյանի քրեական հետապնդումը։ Մնաց միայն կաշառք ստանալու մեղադրանքը Ռոբերտ Քոչարյանի հանդեպ և փողերի լվացման մեջ Արմեն Գևորգյանի մեղադրանքը։ Այս առնչությամբ գլխավոր դատախազությունը դիմել է ՍԴ՝ մեղադրանքի վերաորակավորմանը խոչընդոտող ՔԿՕ դրույթների մասով։