ԵՐԵՎԱՆ, 31 օգոստոսի – Sputnik. Քասախ համայնքի ղեկավար, «Պատիվ ունեմ» խմբակցության պատգամավոր Աննա Մկրտչյանի հոր` Արա Մկրտչյանին առաջադրված մեղադրանքը լրացվել է նոր դրվագներով։ Ինչպես հայտնում է ՀՀ Հատուկ քննչական ծառայությունը, նախաքննությամբ պարզվել է, որ գյուղապետը, օգտագործելով համայնքի բնակիչների կախվածությունն իրենից, նրանց գույքին վնաս պատճառելու սպառնալիքով վերջիններիս հարկադրել է ԱԺ արտահերթ ընտրություններին քվեարկել «Պատիվ ունեմ» դաշինքի օգտին։ Նա նաև բարեգործության անվան տակ խոստացել է դրա դիմաց գյուղացիներին ծառայություններ մատուցել:
2021 թվականի հունիսի 17-ին Արա Մկրտչյանը Քասախում գտնվող «Նևրոզների կլինիկայի» տնօրենի հետ միասին կազմակերպել և անցկացրել է ժողով` ընկերության աշխատակիցների մասնակցությամբ, որոնց մեծ մասը եղել են Քասախ համայնքի բնակիչներ:
Ըստ գործի նյութերի` գյուղապետը շահարկել է իր դստեր` Աննա Մկրտչյանի` «Պատիվ ունեմ» դաշինքի ընտրացուցակի 3-րդ տեղում լինելը և արտահայտելով իր մերժողական դիրքորոշումը «Քաղաքացիական պայմանագիր» կուսակցության նկատմամբ, նախորդ տարիներին համայնքի ղեկավարի լիազորություններն իրականացնելը ներկայացրել է որպես համայնքի բնակիչներին արած «լավություն»: Ապա, շեշտելով, որ ժամանակն է դրա դիմաց պատասխան «լավություն» ստանալու, սպառնացել է քանդել տարիներ առաջ արված ասֆալտը։
Նույն ժողովում Քասախի գյուղապետը նաև խոստացել է «Պատիվ ունեմ» դաշինքի հաղթանակի դեպքում ասֆալտապատել «Նևրոզների կլինիկայի» հարակից տարածքն ու այգի կառուցել:
Այս արարքների կատարման համար Արա Մկրտչյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի 4-րդ մասի 2-րդ կետով և 154.2-րդ հոդվածի 5.1-րդ մասի 2-րդ կետով (Ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):
ՀՔԾ–ում քննվող քրեական գործի նախաքննությունն ավարտվել է: Այն, ըստ ամենայնի, առաջիկայում կներկայացվի դատարան։
Նշենք, որ Արա Մկրտչյանի նկատմամբ մեկ այլ քրեական գործ էլ քննվում է ՀՀ Քննչական կոմիտեում։ Դրանով համայնքի ղեկավարը մեղադրվում է Քասախում հողերի անօրինական վաճառքի ու ապօրինի աճուրդների արդյունքում շուրջ 40 միլիոն դրամի յուրացման համար։