ԵՐԵՎԱՆ, 26 օգոստոսի – Sputnik. ԱԺ «Հայաստան» դաշինքի ղեկավար, ՀՀ պաշտպանության նախկին նախարար Սեյրան Օհանյանը պահանջում է պաշտպանության նախարարությունում քննարկում կազմակերպել` բանակում իր ղեկավարման տարիներին եղած խնդիրներն ու թերությունները քննարկելու համար։ Այսօր ԱԺ նիստի ժամանակ իր ելույթում այս մասին ասաց Օհանյանը` անդրադառնալով երեկ տեղի ունեցած միջադեպին։
Հայտնել էինք, որ ՔՊ-ական պատգամավոր Հայկ Սարգսյանի վրա Օհանյանը շիշ նետեց, քանի որ Սարգսյանն իր ելույթում ակնարկելով Օհանյանին, ասել էր, թե «ոչ մի նախկին ՊՆ ղեկավար, որի օրոք մարդիկ փողով ազատվել են բանակից, իրավունք չունի խոսելու»։
Խոսելով Հայկ Սարգսյանի մասին` Օհանյանը նշեց. «Մարդ, որը մեկ վայրկայում մարդկային ու մտերիմ հարաբերությունները փողոցային բամբասանքի է վերածում, նրա հետ խոսելու ոչինչ չունեմ»։
Ինչ վերաբերում է բանակում առկա թերություններին, նախկին նախարարը չհերքեց` դրանք եղել են ու այսօր էլ կան։
«Բոլորի օրոք էլ բանակում եղել են թերություններ։ Ես առաջին հերթին այսօր պաշտպանում եմ պաշտպանության նախարար Արշակ Կարապետյանին, քանի որ թերությունները եղել են և այսօր էլ կան»,– ասաց Օհանյանը։
Հիշեցնենք, որ երեկ` օգոստոսի 25-ին, Ազգային ժողովի հերթական նիստում միջադեպ տեղի ունեցավ։ «Քաղաքացիական պայմանագիր» խմբակցության պատգամավոր Հայկ Սարգսյանի վրա (ավելի հայտնի որպես «Շիշ բռնող») սկսեցին շշեր շպրտել, այն բանից հետո, երբ նա հայտարարեց, որ ինքը ստիպված է բառերով պատասխանել, քանի որ «իրենց վարչապետը արգելել է ընդդիմադիրների գլուխները ջարդել»։
«Հայաստան» դաշինքի ղեկավար, ՀՀ պաշտպանության նախկին նախարար Սեյրան Օհանյանը դրան արձագանքեց` ասելով. «Ռազբորկա՞ ես անում», և մի շիշ գցեցին Սարգսյանի ուղղությամբ, որին հաջորդեցին մյուսները։