ԵՐԵՎԱՆ, 26 օգոստոսի - Sputnik. Այն մասին, որ Գորիս– Կապան հատվածում կան խնդիրներ ու կարող են ծագել տրանսպորտային լոգիստիկ բարդություններ, ՀՀ վարչապետ Նիկոլ Փաշինյանն ասել է դեռ 2020թ–ի իր ուղերձում։ Այս մասին այսօր ԱԺ–ում իր ելույթում խոսելով Սյունքիում ծագած խնդրի ու ներկա իրավիճակի մասին, հիշեցրեց ինքը` Փաշինյանը։
«Դեկտեմբերի 19-ին ես հանդես եմ եկել ուղերձով, ասել եմ , որ Գորիս–Կապան հատվածում մենք խնդիր ունենք, և, ըստ էության, ասել եմ հետագայում, որ մենք ամբողջությամբ այդ պատասխանատվությունը կրում ենք»,– ասաց նա։
Փաշինյանը նաև շեշտեց, որ նույն ուղերձում ինքը հայտարարել էր, որ ճանապարհային խնդիրները լուծեու համար անհրաժեշտ է ունենալ եռակողմ փաստաթուղթ։
«Հիմա դուք ինձ կհարցնեք` մենք ունեցա՞նք եռակողմ փաստաթուղթ։ Ո՛չ, չունեցանք։ Փոխարենը ՊՆ–ն դեկտեմբերի 19-ին հայտարարություն տարածեց, որտեղ ասվում էր. «Սյունիքի մարզի Գորիս–Կապան ավտոճանապարհի 21կմ–անոց հատվածը որոշ տեղերում անցնում է վիճարկելի տարածքով։ Համաձայն ձեռք բերված պայմանավորվածության` Գորիս–Դավիթ Բեկ ճանապարհային հատվածում երթևեկության անխափան կազմակերպման նկատառումով տեղակայվում են ռուս սահմանապահ ուժեր։ Գորիս Կապան ավտոճանապարհի անվտանգությունը, որն անցնում է վիճարկելի տարածքով, կապահովվի ռուս սահմանապահների միջոցով»,– ասաց Փաշինյանը` մեջբերելով ՊՆ–ի փաստաթուղթը։
Ինչ վերաբերում է «վիճարկելի» եզրույթին, Փաշինյանը պարզաբանեց, որ այդ հատվածը վիճարկելի է դարձել «ՀՀ վարչատարածքային բաժանման մասին» օրենքով։ Բացի այդ, Փաշինյանը նաև հիշեցրեց, որ դեռ 2010թ–ին նախագծված Հյուսիս–հարավ ճանապարհը չէր անցնում Որոտան–Շուռնուխ հատվածով։
«Բա որ դուք Հյուսիս–հարավի նախագիծը կազմում էիք, ինչո՞ւ Հյուսիս–հարավ ճանապարհը չէր անցնում Որոտան– Շուռնուխ հատվածով։ Այլ նախագծված է այնպես, որ պետք է թունելներ կառուցվեն, որը նախագիծը մի քանի տոկոսով թանկացնում է։ Բա ինչո՞ւ չեք տարել նախագիծն այդ կողմով։ Մե՞նք ենք վիճարկելի դարձրել։ Ո՛չ»,– ասաց Փաշինյանը` դիմելով դահլիճում ներկա նախկին իշխանության ներկայացուցիչ` ընդդիմադիր խմբակցույունների անդամներին։
Վարչապետը նաև հայտարարեց, որ Հյուսիս–հարավ ճանապարհի նախագծում չի նախատեսվել նաև Երասխ–Տիգրանակերտ–Զանգակատուն հատվածը։ Նրա խոսքով` այսօր բարձրացվվում է անկլավների փոխանակման խնդիրը, մինչդեռ տարիներ առաջ այդ հատվածը ինչ–որ անհայտ պատճառներով դուրս է թողնվել ճանապարհաշինական նախագծից։
Հիշեցնենք` ՀՀ ազգային անվտանգության ծառայությունն այսօր հաղորդագրություն էր տարածել այն մասին, որ օգոստոսի 25-ին ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Նշված հատվածում գտնվող տրանսպորտային միջոցները տարհանվել են: Աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ:
Հայ-ադրբեջանական սահմանին իրավիճակը սրվել է մայիսի 12-ից։ Ադրբեջանցի զինվորականները գտնվում են Սև լճի շրջանում ՝ փորձելով ամրանալ այստեղ հայկական տարածքների հաշվին։ Նման իրավիճակ է ստեղծվել Գեղարքունիքի մարզում ՝ Վարդենիսի մոտակայքում։
Լարվածության ևս մեկ օջախ Արարատի մարզի Երասխ գյուղի մոտակայքում է։ Այդ հատվածներում պարբերաբար տեղի են ունենում միջադեպեր, ինչի հետևանքով կան զոհեր և վիրավորներ։