ԵՐԵՎԱՆ, 25 օգոստոսի - Sputnik․ «Արմֆայթինգ» պրոֆեսիոնալ ֆեդերացիայի նախագահ, մարտարվեստի վարպետ Հայկ Ղուկասյանը Sputnik Արմենիայի մամուլի կենտրոնում ասուլիսի ժամանակ արձագանքեց վերջին օրերին Ազգային ժողովում տեղի ունեցող հրմշտոցներին և կռիվներին։
«Եթե հայտ ներկայացնեն մրցելու, անպայման իրենց հետ կաշխատենք։ Իսկ եթե լուրջ` կարծում եմ` դա հարիր չէ մեր ժողովրդին։ Ավելի խելացի ու ճիշտ աշխատանք պետք է տարվի մեր երկրի, մեր սահմանների խաղաղության համար», – ասաց Ղուկասյանը։
Նրա խոսքով` Ազգային ժողովում «ռինգ» սարքելու փոխարեն ավելի լավ է զբաղվեն կրթական ոլորտով, մասնավորապես` սահմանամերձ գյուղերի դպրոցներով։
«Պատերազմող երկրի սահմանամերձ գյուղերի մեծ մասի դպրոցներում ֆիզկուլտուրա առարկա չեն անցնում։ Ինչո՞ւ, որովհետև սպորտային դահլիճները չեն համապատասխանում։ Ես ասել եմ էս խնդրի մասին ու էլի ասելու եմ, մինչև չլուծվի։ Երկրի ոչ մի ղեկավար չի կարա իմ բերանը փակի։ Ես ոչ մի քաղաքական թև չեմ ներկայացրել ու չեմ ներկայացնում», – ասաց Ղուկասյանը։
Նա նշեց, որ իր ֆեդերացիայով իրենց ուժերի սահմաններում տարբեր ծրագրեր են իրականացնում։ Նրա խոսքով` մոտ կես միլիոն դոլարի ծրագրեր են ֆինանսավորել` ներառյալ վճարելով ՀՀ–ում գործող ութ դպրոցի մինչև 5-րդ դասարանի երեխաների սննդի համար։
Ղուկասյանը նաև նշեց, որ մարզամշակութային կենտրոն են կառուցել մարզերից մեկում, որտեղ երեխաները կարող են մարզվել, լողալ սովորել և այլն։