ԵՐԵՎԱՆ, 25 օգոստոսի – Sputnik. Վրաստանում շուտով 12 տարեկանից բարձր երեխաներին կպատվաստեն կորոնավիրուսի դեմ։ Տեղեկությունը հայտնում է Sputnik Գրուզիան` հղում անելով երկրի առողջապահության փոխնախարար Թամար Գաբունիային։
Նշվում է, որ գերատեսչությունում վստահ են` երկրում երեխաների պատվաստումը կնպաստի, որ կորոնավիրուսը նահանջի։
«12 տարեկանից բարձր երեխաների պատվաստումը մեզ մոտեցնում է համաճարակի ավարտին։ Պատվաստումների կոմիտեն կդիտարկի այդ հարցը, և որոշումը կկայացվի 2-3 շաբաթից։ Եվրոպական մի շարք երկրներ արդեն այդպես են վարվում, և մենք հաշվի կառնենք նրանց փորձը»,- ասել է Գաբունիան։
Նրա խոսքով՝ 12 տարեկանից բարձր երեխաների պատվաստումը Վրաստանում կիրականացվի միայն ծնողների ցանկությամբ ու որոշմամբ։
Հիշեցնենք՝ այս պահի դրությամբ Վրաստանում պատվաստվել կարող են 16 տարեկանից բարձրերը։ Վերջին տվյալների համաձայն՝ Վրաստանում պատվաստվել է 1 038 292 մարդ։