ԵՐԵՎԱՆ, 25 օգոստոսի – Sputnik. Ազգային ժողովում անվտանգության աշխատակիցներն այսօր հրմշտում են ԱԺ նիստը լուսաբանող լրագրողներին։
Հայտնել էինք, որ ԱԺ–ում այսօր մի քանի անգամ իրարանցում և հրմշտոց տեղի ունեցավ։
Անվտանգության աշխատակիցներին դուր չեկավ այն հանգամանքը, որ լրագրողներն իրենց համար հատկացված վայրից նկարում էին, թե ինչ է տեղի ունենում ԱԺ նիստերի դահլիճում։
Մասնավորապես, անվտանգության աշխատակիցները լրագրողներին հրմշտելով դուրս բերեցին նրանց համար նախատեսված օթյակից։
««Մի՛ քաշի, համբերի՛», «Չհրե՛ս ինձ»»,– ասում էին լրագրողներն անվտանգության աշխատակիցներին։
Նշենք, որ այսօր ԱԺ–ում մի քանի անգամ քաշքշուկ եղավ։ ՔՊ-ական պատգամավոր Հայկ Սարգսյանի վրա (ավելի հայտնի որպես «Շիշ բռնող») ընդդիմության ներկայացուցիչները շշեր շպրտեցին, քանի որ Սարգսյանը, ակնարկելով «Հայաստան» դաշինքի ղեկավար, ՀՀ պաշտպանության նախկին նախարար Սեյրան Օհանյանին, ասաց, որ «ոչ մի նախկին ՊՆ ղեկավար, որի օրոք մարդիկ փողով ազատվել են բանակից, իրավունք չունի խոսելու»։
Դրանից հետո Օհանյանը Սարգսյանի ուղղությամբ շիշ նետեց։ Սարգսյանը վերցրեց այդ շիշն ու հետ շպրտեց։ Ուղիղ եթերն ընդհատվեց։
Դրանից հետո «Հայաստան» խմբակցության պատգամավոր Վահե Հակոբյանի ելույթի ժամանակ, երբ նա կառավարության ծրագրի մասին էր խոսում, իշխանության ներկայացուցիչներից մեկը տեղից ասաց. «Այդ ծրագիրը քեզ ենք կերցնելու, արա՛»։ Դրան Հակոբյանն արձագանքեց` ասելով. «Արան դո՛ւ ես, այ տղա»։
Հետո դարձյալ լեզվակռիվ և քաշքշուկ սկսվեց, և նիստն ընդմիջվեց ԱԺ նախագահի կարգադրությամբ։