Դիլիջանում մեկնարկած «Խաղաղության մարտիկ» մրցախաղին մասնակից վեց երկրներից մեկը Հունաստանն է։ Երկիրը ներկայացնող թիմի կազմում նաև արմատներով ալավերդցի Ստավրոս Ձավարյանն է։ Sputnik Արմենիայի թիմը զրուցել է հունահայ ավագ սերժանտի հետ։
Ավագ սերժանտ Ձավարյանը նշում է՝ շատ ուրախ է, որ մրցույթի շնորհիվ հնարավորություն ունեցավ իր ծննդավայր գալու համար։ Հայաստանից ընտանիքի հետ մեկնել են, երբ յոթ տարեկան էր, 31 տարի անց կրկին ոտք է դնում իր հայրենիք։
«Շատ ուրախ եմ ու հպարտ եմ, որ հնարավորություն ունեցա գալու իմ երկրորդ մայր հայրենիքը ու հնարավորություն ունեմ երկիրը տեսնելու, մարդկանց հետ ծանոթանալու»,- նշում է Ստավրոսը։
Անկեղծանում է՝ Հայաստանի մասին շատ բան չգիտի, ծնողներից լսել է, որ գեղեցիկ վայրեր շատ կան, նաև ուտելիքն է շատ համեղ։
Ժպտում է՝ հայերեն խոսում ու հասկանում է, բայց լոռվա բարբառով, գրական հայերենը դժվարանում է հասկանալ։
Հայաստանում շրջել ու երկիրը բացահայտել այս անգամ դժվար թե հաջողվի, առայժմ տեսել է միայն մայրաքաղաք Երևանն ու Դիլիջանը։ Նշում է՝ ցավոք, երկար մնալ չի կարող, իր թիմի հետ պետք է վերադառնա Հունաստան, բայց խոստանում է շուտով գալ ընտանիքի, երկու որդիների հետ, որ տեսնեն, թե որտեղից են իրենց պապերը։