ԵՐԵՎԱՆ, 21 օգոստոսի – Sputnik․ Ամերիկահայ մեգաաստղ Քիմ Քարդաշյանի և ռեփեր Քանյե Ուեսթի ամուսնալուծությունը վերջին շրջանում ամենաքննարկված թեմաներից է։
Քարդաշյանը անգամ KUWTK-ի վերջին սերիայում մեծ հարցազրույցի ժամանակ պատմել էր, որ միշտ կմնա Քանյեի լավագույն ընկերը և մեծագույն երկրպագուն, բայց այժմ այլ բան է փնտրում հարաբերություններում՝ տղամարդ, որ իր հետ սպորտով կզբաղվի, առօրյան կկիսի (այնինչ ռեփերը տարվա մեծ մասը ապրում էր այլ նահանգում և շատ ժամանակ էր անցկացնում իր երաժշտության վրա աշխատելիս)։ Իսկ Ուեսթի մասին լուրեր էին պտտվում, որ նա մոդել Իրինա Շեյքի հետ է սկսել ընկերություն անել։
Բայց փափարացիները «բռնացրել են» ամուսնալուծված աստղերին և լուսանկարահանել։ Նրանք միասին են եղել Մալիբուի շրջաններից մեկում, մեքենան կայանված էր «Nobu Royakan» հյուրանոցի մոտ։ Նախկին ամուսինները հանդիպման համար ընտրել էին Քարդաշյանի սիրելի ռեստորանը՝ ճապոնական «Nobu»-ն։
ET-ն գրում է, որ հավանաբար զույգը հանդիպել էր իրենց չորս երեխաների դաստիարակության հետ կապված հարցերը քննարկելու համար։
«Վերջին շրջանում երեխաները Քիմի մոտ էին, քանի որ Քանյեն աշխատում էր նոր սկավառակի վրա։ Սակայն զույգի մոտ համատեղ դաստիարակությունը լավ է ստացվում», - ասել է կայքին աղբյուրը։
Քանյեն և Քիմը ամուսնացել են 2014 թվականին, չորս երեխա ունեն՝ 8-ամյա Նորթը, 5-ամյա Սեյնտը, 3 տարեկան Չիկագոն և 3 տարեկան Փսալմը։
Քանյեից առաջ Քիմը երկու անգամ ամուսնացած է եղել։ 2000թ․-ին` 19 տարեկանում, նա ամուսնացել է 29-ամյա երաժշտական պրոդյուսեր Դեյմոն Թոմասի հետ։ Նրանք բաժանվել են 2004թ․-ին։
2011թ․-ին Քիմն ամուսնացավ բասկետբոլիստ Քրիս Համֆրիսի հետ, նրանց ամուսնությունը 72 օր տևեց։ Իսկ Քանյե Ուեսթը 2006-2008 թթ․ նշանված է եղել դիզայներ Ալեքսիս Ֆայֆերի հետ։