ԵՐԵՎԱՆ, 20 օգոստոսի - Sputnik. ՏԿԵ նախարար Գնել Սանոսյանն Արմավիրի մարզ կատարած աշխատանքային այցի շրջանակներում ճանաչողական այց է կատարել Հայկական ատոմային էլեկտրակայան, տեղեկացնում են ՀՀ տարածքային կառավարման և ենթակառուցվածքների նախարարությունից։
Սանոսյանին մասնավորապես ներկայացվել է ատոմակայանի 2-րդ էներգաբլոկի շահագործման ժամկետի երկարացման և կայանի արդիականացման ծրագրի շրջանակներում պլանային նախազգուշական վերանորոգման աշխատանքների ընթացքը։
Նախարարը հանդիպել է նաև ՀԱԷԿ-ի ղեկավար աշխատակազմի հետ։
ՀԱԷԿ-ի գլխավոր տնօրեն Էդուարդ Մարտիրոսյանը վստահեցրել է, որ ատոմակայանի մասնագետները նախատեսված ժամանակին և արդյունավետ կիրականացնեն իրենց առջև դրված կարևոր խնդիրները։ Մարտիրոսյանն ընդգծել է նաև, որ Հայկական ատոմային էլեկտրակայանը, հանրապետության համար կարևորագույն ռազմավարական հիմնարկ և տնտեսության քարշիչ ուժը լինելով, մեծ դեր ունի նաև Արմավիրի մարզի աշխատանքային զբաղվածության ապահովման առումով։
«Մեր երկիրը հետպատերազմյան այս փուլում բարդ իրականության մեջ է, և յուրաքանչյուրս մեր աշխատանքը վերանայելու, դրան նորովի վերաբերվելու կարիք ունենք՝ անկախ նրանից, թե ինչքան ժամանակ ենք աշխատում տվյալ պաշտոնում։ Անհրաժեշտ է տեսնել, թե էլ ինչ է պետք անել, որ մեր աշխատանքն է՛լ ավելի արդյունավետ դարձնենք, մեր պետության ու տնտեսության համար ավելի շատ օգտակար աշխատանք կատարենք, քանի որ յուրաքանչյուրիս ներդրած ջանքից է շատ բան կախված»,- ասել է Սանոսյանը` կարևորելով ՀԱԷԿ–ի բազմամյա աշխատակիցների փորձի փոխանցումը երիտասարդ մասնագետներին։
Հիշեցնենք՝ մայիսի 15-ից Մեծամորի ԱԷԿ–ում ընթանում է կապիտալ վերանորոգում` դրա շահագործման ժամկետը մինչև 2026 թ–ը երկարացնելու նպատակով։ Դրա կարևորագույն հանգույցներից մեկը ռեակտորի կմախքի թրծումն է։ Աշխատանքների նախագիծը կազմում են Կուրչատովի ինստիտուտի և «Ատոմէներգոռեմոնտ» ձեռնարկության մասնագետները։ Եթե աշխատանքների արդյունքում կորպուսի ամրությունը բավականաչափ բարձրանա, այդ ժամանակ ռեակտորը (նշանակում է` ամբողջ կայանը) ավելի երկար կծառայի։