ԵՐԵՎԱՆ, 20 օգոստոսի - Sputnik. Սեպտեմբերին Հայաստանում Արգենտինայի առևտրային պալատ կբացվի։ Տեղեկությունը հայտնում է էկոնոմիկայի նախարարության մամուլի ծառայությունը։
Ըստ հաղորդագրության` օգոստոսի 19-ին էկոնոմիկայի նախարար Վահան Քերոբյանն ընդունել է Հայաստանում Արգենտինայի դեսպան Մարիանո Վերգարային։ Հանդիպման ընթացքում քննարկվել է պալատի բացման հարցը։
Նախարարը ողջունել է Հայաստանում Առևտրային պալատ ունենալու գաղափարը և պատրաստակամություն հայտնել աջակցելու վերջինիս արդյունավետ գործունեության ապահովմանը։ Քերոբյանը ներկա կգտնվի պալատի բացմանը, նրա առաջարկով միջոցառմանը կհրավիրվեն նաև հայ գործարարներ երկկողմ համագործակցության հիմքեր դնելու նպատակով։
Քերոբյանը կարևորել է համագործակցությունը երկու երկրների երիտասարդների միջև փոխանակման ծրագրերի իրականացման, սպորտի, պարերի և այլ բնագավառներում, որոնք էլ ավելի կամրացնեն երկու երկրների կապը՝ միաժամանակ նպաստելով նաև զբոսաշրջության զարգացմանը։