Վարչապետ Նիկոլ Փաշինյանն այսօր հյուրընկալել է ամառային Օլիմպիական խաղերին մասնակցած հայ մարզիկներին ու մարզիչներին: Այս մասին տեղեկացնում են վարչապետի աշխատակազմից։
Հայաստանի օլիմպիական հավաքականին ուղղված ողջույնի խոսքում վարչապետը շնորհակալություն է հայտնել օլիմպիականներին՝ Հայաստանի Հանրապետությունը Տոկիոյի օլիմպիադայում ներկայացնելու համար և շնորհավորել մրցանակակիրներին հաջող մրցելույթի առիթով` միաժամանակ կարծիք հայտնելով, որ մեր հավաքականը պատշաճ ձևով է ներկայացրել Հայաստանի Հանրապետությունը:
«Այս օլիմպիադայում մենք ոսկե մեդալ չնվաճեցինք, բայց, կարծում եմ, մեր մասնակցությունից դժգոհ չենք: Իհարկե, այն իրավիճակը, մթնոլորտը, որ առկա է երկրում, իր ազդեցությունն ունենում է մեր մարզիկների, ընդհանրապես սպորտի վրա, բայց ես կարծում եմ, որ այս իրավիճակում մենք կարողացել ենք պատշաճ ձևով ներկայանալ»,– ասել է Փաշինյանը:
Վարչապետը նշել է, որ այսօր արդեն հարկավոր է շատ արագ ամփոփել տեղի ունեցածի արդյունքներն ու միանգամից պատրաստվել հաջորդ օլիմպիադային:
«Կարծում եմ՝ մենք պետք է միջոցներ ձեռնարկենք իսկապես սպորտի մասսայականացման համար: Որովհետև գործնականում այսօր ունենք պրոֆեսիոնալ սպորտ, բայց զանգվածային սպորտի հետ կապված որոշակի խնդիրներ ունենք՝ հետաքրքրության, ենթակառուցվածքի առումով»,– ասել է Փաշինյանը։
Հանդիպանը ներկա ԿԳՄՍ նախարարի տեղակալ Կարեն Գիլոյանը, ամփոփելով Տոկիոյի ամառային Օլիմպիական խաղերին ՀՀ հավաքականի ելույթները, նշել է, որ անկախ Հայաստանի պատմության մեջ սրանք 7-րդ ամառային Օլիմպիական խաղերն էին, որոնց մասնակցում էր մեր հավաքականը, իսկ մեդալների որակական առումով 3-րդ արդյունքն է: Նա անդրադարձել է արձանագրված խնդիրներին, այդ թվում՝ մրցավարական, որոնք պետք է քննարկել և հասկանալ, թե իրականում ինչ է տեղի ունեցել և ինչպես հակազդել դրանց:
Իսկ Հայաստանի ազգային օլիմպիական կոմիտեի նախագահ Գագիկ Ծառուկյանը նշել է, որ հաջորդ անգամ Հայաստանը պետք է պատրաստ լինի ծանրամարտից ոչ թե 2, 3 կամ 1 մարզիկի մասնակցության, այլ 6, իսկ բռնցքամարտից՝ 8, որովհետև, ըստ նրա` պայմաններն արդեն ստեղծված կլինեն։
Հիշեցնեք, որ Հայաստանի հավաքականը Տոկիոյի օլիմպիադայում նվաճել է 4 մեդալ՝ ծանրորդ Սիմոն Մարտիրոսյան (արծաթե մեդալ), Հունահռոմեական ոճի ըմբիշ Արթուր Ալեքսանյան (արծաթե մեդալ), մարմնամարզիկ Արթուր Դավթյան (բրոնզե մեդալ) և բռնցքամարտիկ Հովհաննես Բաչկով (բրոնզե մեդալ): Ընդհանուր առմամբ, օլիմպիական խաղերին մասնակցել է 17 հայ մարզիկ: