ԵՐԵՎԱՆ, 14 օգոստոսի – Sputnik. Ռուսաստանի նախագահ Վլադիմիր Պուտինը ցավակցություն է հայտնել Թուրքիայում հրդեհաշիջման աշխատանքներին մասնակցող Բե–200-ի կործանման հետևանքով զոհված ռուս զինվորականների հարազատներին։ Տեղեկությունը հայտնում է Կրեմլի մամուլի ծառայությունը։
«Ռուս զինծառայողները` Բե–200–ի անձնակազմի անդամները, թուրք մասնագետների հետ համատեղ մարդասիրական կարևոր առաքելության էին մասնակցում, պաշտպանում էին մարդկանց, պայքարում Թուրքիայի Հանրապետությունում մեծածավալ հրդեհների դեմ։ Գործում էին դժվարագույն պայմաններում և մինչև վերջ կատարեցին իրենց մարդկային ու պրոֆեսիոնալ պարտքը։ Հասկանում եմ, որ զոհվածներից յուրաքանչյուրի ընտանիքում հիմա վիշտ է։ Ընդունե՛ք աջակցության անկեղծ խոսքերը։ Համոզված եմ, որ այդ քաջարի մարդկանց մասին հիշատակը ընդմիշտ վառ կմնա և՛ Ռուսաստանում, և՛ Թուրքիայում», – հայտարարել է Պուտինը։
Ավելի վաղ ՌԴ պաշտպանության նախարարությունը հայտնել էր, որ ժամը երեքի սահմանում վայրէջք կատարելու ժամանակ, Թուրքիայում հրդեհաշիջման աշխատանքները կատարելուց հետո Ադանայի մերձակայքում վթարի է ենթարկվել Բե–200 ռուսական ինքնաթիռը։ Նշվում էր, որ օդանավում 5 ռուս զինծառայող է եղել և Թուրքիայի 3 ներկայացուցիչ, որոնք անձնակազմին ուղղորդել են դեպի հրդեհաշիջման աշխատանքների կենտրոններ: Անձնակազմի բոլոր անդամները մահացել են։ Ողբերգության պատճառները պարզելու համար վթարի վայր է ուղարկվել Ռուսաստանի պաշտպանության նախարարության հանձնաժողովը, ինչպես նաև Անկարայում Ռուսաստանի դեսպանատան ներկայացուցիչները: