Շտեմարանները, ըստ էության, ամեն ինչ տանում են անգիր անելու մեխանիզմին, և արդյունքում դիմորդը ոչ թե հայոց լեզու է սովորում, այլ ինչ-որ բաներ ուղղակի անգիր է անում։ Կրթության փորձագետ Սերոբ Խաչատրյանի կարծիքն է «Հայոց լեզվու» առարկայի ընդունելության քննությունների շտեմարանների մասին։
«Խնդրահարույց է այն, թե ինչպես են կազմվում շտեմարանները, ովքեր են տալիս առաջադրանքները, որքանով են դրանք օբյեկտիվ։ Այստեղ իհարկե պետք է որոշակի բարելավումներ արվեն, սակայն քննությունների ժամանակ միշտ ի հայտ է գալիս նույն խնդիրը` թվանշանի օբյեկտիվությու՞նն է կարևոր, թե՞ բովանդակությունը։ Երբեմն հնարավոր է ավելի բովանդակային ու կարևոր առաջադրանքներ կազմել, բայց այդտեղ էլ գնահատականն է սուբյեկտիվանում։ Կարելի է բերել շարադրությունների, փոխադրությունների օրինակը, որոնց գնահատման ժամանակ ի հայտ է գալիս որոշակի սուբյեկտիվություն»,– Sputnik Արմենիայի հետ զրույցում ասաց փորձագետը։
Խաչատրյանի դիտարկմամբ` շտեմարաններում շեշտը դրվում է այնպիսի գիտելիքի վրա, որը հնարավոր է անգիր անել և ավելի օբյեկտիվ ստուգել, պարզապես այդ օբյեկտիվությունը ցավոք հաճախ ձեռք է բերվում բովանդակային կորստի հաշվին։ Ըստ նրա` կոնկրետ քննության առաջարկների ընտրության մեջ պետք է հնարավորինս շատ մարդ մասնակցի, թեև այս դեպքում էլ խնդիրն այն է, որ դա կարող է բերել ինֆորմացիայի արտահոսքի։ Բացի այդ կան մարդիկ կամ առանձին խմբեր, որոնք իրար հետ չեն կարողանում աշխատել, և հաճախ նախապատվությունը տրվում է այս կամ այն խմբին։
Անդրադառնալով այն հարցին, որ Հայաստանում դիմորդներն այս տարի հայոց լեզվից չափազանց ցածր գնահատականներ են ստացել` Խաչատրյանն ընդգծեց, որ դա կեղծ լուր է և զարմանալի է, որ մեծ տարածում ստացավ։
«Այս տարի հայոց լեզվի միջին թվանշանը մոտավորապես 0,4 միավորով ավելի բարձր էր, քան մի քանի տարի առաջ։ Անբավարար ստացածների քանակը նույնպես նորմայի մեջ էր։ Աղմուկը բարձրացավ նրանից, որ Հայոց լեզվի քննության երկրորդ փուլում մոտ հիսուն տոկոսն անբավարար էր ստացել, բայց սովորաբար երկրորդ փուլին մասնակցում են շատ քիչ դիմորդներ, որոնց մեծ մասը, որպես կանոն, պատահական դիմորդներ են, որոնք ուղղակի փորձում են բուհ ընդունվել, բանակից նոր են վերադարձել և նրանց թվանշանների ցուցանիշը չի կարող համարվել օբյեկտիվ»,–ասաց նա։
Խաչատրյանի պնդմամբ` ճշմարտությունն այն է, որ այս տարվա քննության արդյունքները եղել են նորմայի մեջ, չկա նման բան, որ պատկերն այս տարի ավելի վատն էր` ի տարբերություն նախորդ տարվա։
Հիշեցնենք, որ Գնահատման և թեստավորման կենտրոնը հրապարակել է մի շարք առարկաների գծով միասնական քննությունների երկրորդ փուլի արդյունքները:
Ըստ այդմ` բուհ ընդունվողների 46.9%-ը չի հաղթահարել հայոց լեզվից, իսկ 40%-ը՝ մաթեմատիկայից անցողիկ շեմը, այսինքն` դիմորդները չեն կարողացել վաստակել 8 միավոր հնարավոր 20-ից։