ԵՐԵՎԱՆ, 12 օգոստոսի - Sputnik. Ռուսաստանի ներքին գործերի նախարարությունը երկու տեսաբլոգերների՝ մեկ ադրբեջանցու և մեկ ղազախի, արգելել է երկիր մուտք գործել 50 տարի ժամկետով։ Այս մասին հայտնում է ՌԻԱ Նովոստին՝ հղում անելով գերատեսչության մամուլի ծառայությանը:
Նշվում է, որ քաղաքացիների տեսանյութերում ցուցադրվում են էթնիկ ատելություն հրահրելու հստակ նշաններ:
«Այսօր ... որոշումներ են կայացվել Ռուսաստանի Դաշնություն մուտք գործելու թույլտվություն չտրամադրելու համար 50 տարի ժամկետով Ղազախստանի Հանրապետության քաղաքացի Կուատ Ահմետովի և Ադրբեջանի Հանրապետության քաղաքացի Իսֆանդիար Վահաբզադեի համար, ովքեր ազգամիջյան ատելություն հրահրող հրապարակային հայտարարություններ են արել», - ասվում է հայտարարության մեջ:
Նշենք, որ Ղազախստանի բնակիչ Կուաթ Ահմետովը YouTube-ի իր ալիքում հրապարակել է մի շարք տեսանյութեր, որոնցում նա «ֆաշիստ» է կոչում այն ղազախներին, որոնք ռուսերենով են խոսում։ Ղազախստանի նախագահի աշխատակազմի ղեկավարի առաջին տեղակալ Դաուրեն Աբաևը արդեն դատապարտել է բլոգերի գործունեությունը և վստահություն հայտնել, որ իրավապահ մարմինները կտան արդար իրավական գնահատական:
Ավելի վաղ սոցիալական ցանցերում հայտնվել էր մի տեսանյութ, որում մի տղամարդ, որը ներկայացել էր որպես Բելառուսում, Մոլդովայում և Պակիստանում Ադրբեջանի նախկին դեսպան Իսֆանդիար Վահաբզադե, վիրավորանքներով է խոսում Ժիրինովսկու և ռուս ազգի հասցեին։
Ռուսաստանի ներքին գործերի նախարարությունը նաև նախազգուշացրել է, որ Ռուսաստանի Դաշնության, նրա բնակիչների և արտերկրում բնակվող հայրենակիցների դեմ ապակառուցողական գործողությունների կոչ անող օտարերկրացիներին թույլ չեն տա մուտք գործել երկիր, քանի որ նրանց ներկայությունը Ռուսաստանում կարող է սպառնալ հասարակական կարգին և անվտանգությանը: