ԵՐԵՎԱՆ, 11 օգոստոսի – Sputnik. Երաշտի պատճառով մայրաքաղաքում առաջացած ջրամատակարարման խնդիրների վերացման նպատակով քաղաքապետ Դավիթ Սարգսյանը որոշել է դադարեցնել Ստեփանակերտում գործող ավտոլվացման կետերի և հանգստի գոտիների ջրօգտագործումը։ Տեղեկությունը հրապարակվել է Ստեփանակերտի քաղաքապետարանի ֆեյսբուքյան էջում։
Արդեն հայտնել էինք, որ մի քանի օր է, ինչ Ստեփանակերտում ջրի խնդիր կա։ Տեղի իշխանությունները նշում են, որ պատճառը եղանակն է` ջրամբարներում քիչ ջուր է կուտակվել։
«Վերոնշյալ օբյեկտների սեփականատերերին և ջրօգտագործողներին հորդորում ենք ենթարկվել որոշման պահանջին, որի կատարման պատասխանատուն «Ջրմուղ-կոյուղի» ՓԲ ընկերությունն է, իսկ վերահսկողության պատասխանատուն՝ քաղաքապետարանի աշխատակազմի արտադրական ենթակառուցվածքների բաժինը»,–նշված է գրառման մեջ։
Ավտոլվացման կետերի և հանգստի գոտիների ջրօգտագործումը կդադարեցվի` մինչև քաղաքը սնուցող զտիչ կայաններում ջրի պաշարների վերականգնումը:
Հիշեցնենք, որ սոցցանցերում լուրեր են շրջանառվում, որ Ստեփանակերտում ջրի պակասը կապված է այն հանգամանքով, որ իբրև թե Ադրբեջանն է փակել դրա հոսքը։ Այսինքն` իբրև դա կապված է Ադրբեջանի հսկողության ներքո գտնվող Ղայբալիշենի պոմպի աշխատանքի հետ։ Սակայն Sputnik Արմենիայի հետ զրույցում Ստեփանակերտի փոխքաղաքապետ Ռադի Աբրահամյանը հերքել էր այդ լուրերը։