«Նախկին տնօրենին հետ բերելու ծրագիր է սա». բողոքի ակցիա` կենդանաբանական այգում

ԵՐԵՎԱՆ, 11 օգոստոսի – Sputnik. Կենդանաբանական այգու աշխատողներն այսօր կրկին բողոքի ակցիա արեցին` ընդդեմ այգու տնօրենի ժամանակավոր պաշտոնակատար Արևիկ Մկրտչյանի։ Բողոքի ակցիային մասնակցում էին նաև այգու նախկին աշխատակիցները` նշելով, որ մտահոգ են այգուն սպասվող ճակատագրով։

«Այժմ այգու տնօրենի ԺՊ է նշանակվել Արևիկ Մկրտչյանը, որը ժամանակին միջազգային կապերի մասնագետ է եղել այգում։ Սակայն նա ոչ կոմպետենտ անձ է տնօրենի համար, քանի որ իր աշխատելու տարիներին ոչ մի օգուտ չի բերել այգուն, բացի վնասից` ոչ համարժեք փոխանակումներ են եղել կենդանիների»,–ասաց այգու նախկին աշխատակից Անուշ Ռաֆայելյանը։

Նրա խոսքով` Մկրտչյանը սերտ կապեր ունի այգու նախկին տնօրեն Ռուբեն Խաչատրյանի հետ, և Մկրտչյանի նշանակումը նախկին ղեկավարին հետ բերելու ծրագիր է ընդամենը։ Ռաֆայելյանը նշեց, որ Մկրտչյանը հովանավորներ ունի ներկա կառավարությունից, դրա համար էլ նա է նշանակվել։

Այգու մեկ այլ աշխատակից էլ ասաց`ինչո՞ւ են Մկրտչյանին ԺՊ նշանակում, երբ նա ժամանակին հեռացվել է աշխատանքից, և անգամ դատարան դիմելուց հետո չի վերականգնվել այգում զբաղեցրած իր պաշտոնին։

Կենդանաբանական այգու աշխատակիցներից տիկին Էլիզան էլ նշեց, որ պայքարում են, որպեսզի այգին խոտածածկ տարածքի չվերածվի։

«Խնդիրն անձնավորված չէ` մենք ուզում ենք կենդանիներ տեսնել այստեղ, ոչ թե կարուսելներ ու սրճարաններ։ Հիմա ոտքի էր սկսել կանգնել կենդանաբանական այգին, բայց նոր ԺՊ–ի նշանակմամբ` մենք լավ հույսեր չենք կապում այգու ապագայի հետ»,–ասաց նա։

Բողոքի ակցիա անողները ասացին, որ ուզում են այգու կառավարման խորհրդի հետ հանդիպել, որպեսզի հասկանան` ինչու է Մկրտչյանը նշանակվել ժամանակավոր պաշտոնակատար։ Մեկ շաբաթ անց, եթե ցանկալի պատասխան չլինի, ապա աշխատակիցները կրկին բողոքի ակցիա կանեն։

Հիշեցնենք, որ օրեր առաջ այգու աշխատակիցները կրկին բողոքի ակցիա էին արել նույն պահանջով` նշելով, որ բողոքի ակցիաները շարունակական բնույթ են կրելու։ Հավելենք, որ 2019-ի նոյեմբերի 1-ին դադարեցվեց Ռուբեն Խաչատրյանի պաշտոնավարումը որպես այգու տնօրեն. մինչ այդ նրա դեմ բողոքի ակցիա էին ընթանում։