ԵՐԵՎԱՆ, 11 օգոստոսի – Sputnik. Ադրբեջանն ամեն կերպ ջանում է գետնին հավասարեցնել և վարկաբեկել ռուս խաղաղապահների ներկայությունը Լեռնային Ղարաբաղում, դրան են միտված հրադադարի ռեժիմի խախտման վերջին դեպքերը։ Sputnik Արմենիայի հետ զրույցում նման կարծիք հայտնեց ռուս քաղաքագետ Անդրեյ Արեշևը` նշելով, որ Բաքուն զուգահեռ տեղեկատվական օպերացիա է իրականացնում` Երևանին մեղադրելով զինված ուժերը Լեռնային Ղարաբաղ տեղափոխելու, իսկ խաղաղապահներին` անգործության մեջ։
Российский политолог Андрей Арешев на четвертом заседании армяно-российского "Лазаревского клуба" (14 июня 2021). Еревaн
© Sputnik / Aram Nersesyan
Ադրբեջանի ԶՈւ–ն օգոստոսի 9-ին և 11-ին գնդակոծել է Պաշտպանության բանակի դիրքերը մի շարք ուղղություններով։ Ամսի 9-ին հակառակորդը հրազենից բացի կիրառել է նաև հաստոցավոր հակատանկային նռնականետներ։ Իսկ այսօր հարվածային անօդաչու թռչող սարքեր է գործի դրել։ Հայկական կողմից ոչ ոք չի տուժել։ Ադրբեջանի ՊՆ–ն Հայաստանին մեղադրում է անձնակազմը «ադրբեջանական տարածք» (այսինքն` Արցախ) տեղափոխելու մեջ։ Պաշտոնական Բաքուն հայտարարում է նաև, որ ռուս խաղաղապահները պետք է կանխեն Հայաստանի այդօրինակ գործողությունները։
Արեշևի կարծիքով` Ադրբեջանի ղեկավարության գործողություններն ու հռետորաբանությունը երկու առանցքային նպատակ ունեն։ Նախ` որոշակի լարվածություն ստեղծել Ղարաբաղում։ Այդ առումով չի կարելի բացառել նման տեղեկատվական և ռազմաքաղաքական գործողությունների կրկնությունը։
«Ադրբեջանում բավական շատ քննադատական արտահայտություններ և մեղադրանքներ հնչեցին, ինչպես իրենք են կարծում, ԼՂ–ում ռուսական խաղաղապահ զորախմբի անօրինական գտնվելու կապակցությամբ։ Ռուս խաղաղապահների մուտքից ի վեր ամենահեղինակավոր փորձագետները ենթադրություններ են հնչեցրել, որ ռուսական ներկայությունը վարկաբեկելու նպատակով սադրանքներ ու տեղեկատվական «լցոնումներ» կլինեն», – ասաց մեր զրուցակիցը։
Փորձագետը դժվարանում է կանխատեսել Ադրբեջանի նման քաղաքականության հետևանքները։ Սակայն ենթադրում է, որ Լեռնային Ղարաբաղին առնչվող հարցերից պաշտոնական Երևանի հետ քաշվելու պայմաններում ժամանակ առ ժամանակ ի հայտ եկող խնդրահարույց պահերը ֆորմալ կամ ոչ ֆորմալ կերպով հարթվելու են Մոսկվայի և Բաքվի միջև։ Այլ արդյունավետ մեխանիզմ Արեշևը չի տեսնում։
Ինչ վերաբերում է երկրորդ նպատակին, ապա դա սահմանագծման հարցում Երևանի վրա ճնշում գործադրելն է, ինչը Բաքվում որևէ մեկը չի թաքցնում։
«Ադրբեջանական տարբեր աղբյուրները բավականին անկեղծ են խոսում հիպոթետիկ սահմանագծման և սահմանազատման նախաշեմին բանակցային դիրքերը բարելավելու ձգտման մասին։ Ըստ ադրբեջանական կողմի` սահմանագծումը ճանապարհ կհարթի հաշտության պայմանագրի համար, որը նախկին խորհրդային սահմանների ճանաչում կենթադրեր, սակայն Բաքվի համար առավել հարմար կոնֆիգուրացիայով։ Եվ պետք է ասեմ, որ ադրբեջանցիները բավական հետևողականորեն աշխատում այդ տրամաբանության մեջ», – հավելեց Արեշևը։
Նա դժգոհ է, որ ի տարբերություն հակառակորդի` Հայաստանի ղեկավարությունը հոսանքի ուղղությամբ է գնում և, զրկված լինելով արտաքին քաղաքական սուբյեկտ լինելուց, համաձայնում է այն ամենի հետ, ինչ առաջարկում են իրեն։ Առավելագույնը, որ ժամանակ առ ժամանակ կարող է անել Երևանը, աննշան հարցերի շուրջ սակարկելն է։
Հասարակության շրջանում և ԶԼՄ–ներում վերջին երկու ամիսների ընթացքում լուրեր են պտտվում, որ Հայաստանը մտադիր է Ադրբեջանի հետ հաշտության պայմանագիր կնքել, որը ենթադրում է սահմանների ճանաչում և այլ զգայուն հարցերի լուծում։ Այս կասկածները ժամանակ առ ժամանակ սրվում են Հայաստանի տարածքում ադրբեջանական անկլավների գոյության և դրանց հնարավոր փոխանցման մասին իշխող ուժի այս կամ այն ներկայացուցիչների հայտարարություններից հետո։