ԵՐԵՎԱՆ, 10 օգոստոսի – Sputnik. «Հայաստան» դաշինքի պատգամավոր Դավիթ Սեդրակյանը կարծում է, որ իրենց խմբակցության պատգամավոր Իշխան Սաղաթելյանին ԱԺ փոխխոսնակ ընտրելու հարցում իշխող կուսակցությունը թերագնահատել էր ընդդիմադիրներին։ Սեդրակյանը նման կարծիք հայտնեց ԱԺ–ում լրագրողների հետ ճեպազրույցում ` անդրադառնալով Սաղաթելյանի` երրորդ փորձից ընտրվելուն։
Նշենք, որ Սաղաթելյանը երրորդ փորձից հետո ԱԺ փոխխոսնակ ընտրվեց, քանի որ ձայները չէին բավականացնում։ Դավիթ Սեդրակյանը` նախկին պատգամավոր Մհեր Սեդրակյանի (Թոխմախի Մհեր) որդին, ներկա չէր ԱԺ նիստերին, և իշխանությունն ընդդիմությանն ասում էր, որ նրա քվեն է պակասում Սաղաթելյանին ընտրվելու համար։
«Ես երկրից դուրս էի գնացել, ինչի պատճառների մասին տեղյակ եմ պահել ֆրակցիայի ղեկավարներին։ Բացի այդ, մենք ամեն ինչ քննարկում ենք ֆրակցիայում, և իմ` նիստերին չմասնակցելու մասին նախապես խոսել ենք։ Ինչ վերաբերում է իշխանության կեցվածքին, ապա ես դա որակում եմ մանիպուլյացիա»,–ասաց Սեդրակյանը։
Նշենք, որ Սեդրակյանի հայրն ԱԺ–ում լրագրողների հետ միջադեպեր էր ունեցել. այսօր լրագրողները հետաքրքրվեցին, թե ինչպես է Դավիթ Սեդրակյանը վերաբերվում այդ դեպքերին։ Ի պատասխան վերջինս նշեց, որ եթե լրագրողները մոտենան Երևանի կեսին ու նյարդայնացնեն, կարող է`նման միջադեպեր լինեն։
«Խոսքն այդ տարիքի, տարիքով մարդկանց մասին է։ Հիմա կասեք` բա ինչո՞ւ էր այդ տարիքի մարդը եկել ԱԺ, կարող է` արդարացի լինի ձեր ասածը։ Լրագրողների հետ հայրս 2 դեպք է ունեցել, ու օրեր անց երկու պարագայում էլ նրանց հարաբերությունները հարթվել են»,–ասաց Դավիթ Սեդրակյանը` հավելելով, որ ինքն անձամբ շատ լավ է վերաբերվում լրագրողներին։
Հիշեցնենք, որ մի դեպքում նախկին ԱԺ պատգամավոր Մհեր Սեդրակյանը հայհոյել էր լրագրողներից մեկին, իսկ մեկ այլ լրագրողի ասել, որ ծնոտը կպոկի։