ԵՐԵՎԱՆ, 3 օգոստոսի – Sputnik. Ազգային ժողովի 12 հանձնաժողովներից 3-ի նախագահությունը կվերապահվի ընդդիմությանը։ ԱԺ-ում լրագրողների հետ ճեպազրույցում ասաց «Հայաստան» խմբակցության պատգամավոր Արմեն Ռուստամյանը։
«Մի տեղ մեր քվոտայից «Պատիվ ունեմ» դաշինքի համար կառանձնացնենք. 3-րդ և 6-րդ հանձնաժողովների ընտրությունը մերն է: Սակայն դեռ պարզ չէ, թե իշխանություններն առաջին երկուսը որ հանձնաժողովները կվերցնեն, որ մնացածից էլ մենք մի բան որոշենք»,–ավելացրեց Ռուստամյանը։
Լրագրողների դիտարկմանը, թե որպես կանոն իշխանության հետ ներքին պայմանավորվածություն է լինում այդ հարցում, Ռուստամյանն արձագանքեց, որ իշխանության հետ այս հարցում որևէ ներքին պայմանավորվածություն չի լինելու։ Ավելին, ըստ նրա, ամեն ինչ լինելու է հրապարակային, բոլորի աչքի առաջ:
Նշենք, որ պատգամավորներն այժմ ԱԺ նախագահի տեղակալներ են ընտրում։ Ընտրության արդյունքները հայտնի կլինեն այսօր` ժամը 14։30-ին։ Դրանից հետո նախատեսվում է նաև հանձնաժողովների նախագահների ընտրությունը։