ԵՐԵՎԱՆ, 2 օգոստոսի – Sputnik. Մարմնամարզիկ Արթուր Դավթյանը հենացատկի մրցումներում 14,733 միավորով դարձավ Տոկիոյի օլիմպիական խաղերի բրոնզե մեդալակիր: 1980 թվականին Մոսկվայում կայացած օլիմպիական խաղերից հետո նա առաջին մարմնամարզիկն է, որը մեդալ է վաստակում օլիմպիական խաղերում։
Դավթյանն ընդամենը հինգ հարյուրերոդական միավորով զիջեց առաջին և երկրորդ տեղը գրաված մարզիկներին։
Ոսկե մեդալի արժանացավ Հարավային Կորեայի ներկայացուցիչ Ջեհվան Սինը (14,783)։ Արծաթը բաժին հասավ ռուսաստանցի Դենիս Աբլյազինին։ Ռուսաստանցի մարմնամարզիկը նույն արդյունքը ցուցադրեց, բայց ցատկի բարդության համար նախապատվությունը տրվեց կորեացուն։
Արթուրը հիանալի կատարեց առաջին ցատկը, որից հետո ստացավ 14,800 գնահատականը։ Երկրորդ ցատկի ժամանակ առգետնումը մի փոքր հաջող չէր, և այդ պատճառով նա ստացավ 14,666 գնահատականը, իսկ միջին արդյունքը ստացվեց 14,733։ Իսկ ահա մրցակիցները ավելի լավ կատարեցին երկրորդ ցատկը, ինչի արդյունքում էլ ձևավորվեց մրցանակային եռյակը։ Անկախ մեդալի հարգից Արթուր Դավթյանի մեդալը հրաշալի արդյունք է և Հայաստանի օլիմպիական հավաքականի առաջին մեդալը Տոկիո 2020-ում։