ԵՐԵՎԱՆ, 26 հուլիսի – Sputnik. Պարեկային նոր ծառայության ավտոմեքենաների արտաքին ձևավորումն առաջիկայում կփոխվի։ Այսօր կայացած մամուլի ասուլիսի ժամանակ տեղեկությունը հայտնեց արդարադատության նախարարության միջազգային իրավական համագործակցության համակարգող-խորհրդական Ամալյա Հովսեփյանը` անդրադառնալով քննադատություններին։
Նշենք, որ քաղաքացիները բողոքում էին Երևանում հուլիսի 7-ին մեկնարկած պարեկային նոր ծառայության մեքենաների արտաքին տեսքի ձևավորումից, իսկ Լեզվի կոմիտեն հայտարարություն էր տարածել` ասելով, որ մեքենաների վրա զետեղված տեղեկույթում գերակայում է օտար լեզուն:
«Պարեկային նոր ծառայության դիզայնի հետ կապված քննադատություն եղել է ոչ միայն քաղաքացիների, այլև որոշ պետական մարմինների կողմից։ Սա նորմալ է, որովհետև բոլորովին նոր սկսվող ծառայությունը չի կարող իդեալական լինել: Հաշվի առնելով քննադատությունները, այսօր արդեն վերանայում ենք մեքենաների դիզայնը»,–ասաց Հովսեփյանը` հավելելով, որ փոփոխությունները վերաբերում են նաև մեքենայի վրա գրված լատինատառ գրառումներին։
Դիմավորեք. Երևանում ծառայության են դուրս եկել պարեկային ոստիկանության ծառայողները
Նա հայտնեց նաև, որ այսօր արդեն իսկ 700 պարեկներ են ծառայություն իրականացնում Երևանում, իսկ 8-9 ամիս հետո նոր պարեկային ծառայությունը կներդրվի Շիրակի և Լոռու մարզերում։
Հովսեփյանը նշեց` Պարեկային ծառայությունը Ճանապարհային ոստիկանությունը չէ, այն շատ ավելին է, և գործառույթներն ավելի շատ են։ Իսկ ինչ վերաբերում է պարեկների գործառույթներին, ապա նրա խոսքով` հանցագործին վնասազերծելու համար պարեկն իրավունք ունի տարբեր գործիքներ կիրառել` մեքենային հարվածով կանգնեցնել, մարտավարական հմտություններ, ձեռնաշղթա, մահակ և ընդհուպ մինչև ատրճանակ կիրառել։
Նա հավելեց նաև, որ մինչև 2023-ի առաջին եռամսյակի ավարտը ՀՀ ողջ տարածքում պարեկային ծառայություն կգործի։
Քահանան օրհնության կարգ կատարեց, և պարեկները ծառայության անցան Երևանում. տեսանյութ