ԵՐԵՎԱՆ, 3 հուլիսի - Sputnik․ Մեծի Տանն Կիլիկիո կաթողիկոս Արամ Առաջինը խնդրել է Հռոմի պապին օգտակար լինել հայ գերիների վերադարձի հարցում: Տեղեկությունը հայտնում է Մեծի տանն Կիլիկիո հայկական եկեղեցին՝ Facebook-ի պաշտոնական էջում։
Նշվում է, որ Վատիկանում վերջերս կայացած հանդիպման ընթացքում Արամ Ա կաթողիկոսը Հռոմի պապ Ֆրանցիսկոս Առաջինի հետ խոսել է Արցախի 44-օրա պատերազմի ու Ադրբեջանում պահվող հայ ռազմագերիների վերադարձի մասին։
«Վեհափառ Հայրապետը հիշեցրեց, որ միջազգային օրենքներին դեմ է ռազմագերիների նկատմամբ Ադրբեջանի ցուցաբերած հակաօրինական մոտեցումը: Վեհափառ հայրապետն իր ջերմ շնորհակալությունը հայտնեց Նորին սրբություն Ֆրանցիսկոս պապին, որ անդրադարձել է գերիների հարցին և խնդրեց, որ հարմար առիթով դարձյալ անդրադառնա մեր ժողովրդին հուզող հիշյալ հարցին՝ օգտակար հանդիսանալով գերիների շուտափույթ վերադարձին»,- նշված է հաղորդագրության մեջ:
Այս հարցով Արամ Առաջինը խոսել է նաև Վատիկանի պետական քարտուղար կարդինալ Փարոլինիի հետ:
Գերիների վերադարձի հարցի շուրջ ունեցած հանդիպումների վերաբերյալ Մեծի Տանն Կիլիկիո կաթողիկոսը մանրամասներ է փոխանցել Վատիկանում Հայաստանի Հանրապետության դեսպան Կարեն Նազարյանին:
Ավելի վաղ հայտնել էինք, որ հուլիսի 1-ին Քրիստոնյա հայրապետների ժողովի առաջին նիստում Արամ Ա կաթողիկոսը «Հասարակական-քաղաքական ներկա ճգնաժամը Լիբանանում և այն դիմագրավելու միջոցները» թեմայով դասախոսություն է կարդացել։
Նրա ելույթից հետո շուրջ երկու ժամ լայն քննարկում է տեղի ունեցել։
Ներկաները դրական են գնահատել Արամ Ա–ի` երկիրը քաղաքական ու տնտեսական ճգնաժամից դուրս բերելու վերաբերյալ վերլուծությունները։
Կեսօրին Հռոմի պապ Ֆրանցիսկոս Առաջինը հյուրընկալել է հոգևոր հայրերին ու նրանց պատվիրակությունների անդամներին։
Մեծի Տանն Կիլիկիո կաթողիկոս Արամ Ա–ն մեկնում է Վատիկան` Հռոմի պապի հետ հանդիպելու