Ինչպես նախընտրական շրջանում, այնպես էլ հետընտրական փուլում ՀՅԴ ԳՄ ներկայացուցիչ, «Հայաստան» դաշինքի ցուցակի 2-րդ տեղում ընդգրկված Իշխան Սաղաթելյանը շարունակում է հանդիպումները տարբեր քաղաքական գործիչների, ընդդիմադիր դաշտի ներկայացուցիչների հետ։ Տեղեկությունը Sputnik Արմենիայի հետ զրույցում հայտնեց Սաղաթելյանը։
«Տարբեր գործիչների, կուսակցությունների ղեկավարների հետ հանդիպումներ ունեցել եմ, ունենալու եմ, քննարկել և քննարկելու ենք երկրում ստեղծված իրավիճակը։ Ընտրություններից հետո Սերժ Սարգսյանի հետ էլ եմ հանդիպել, այլ գործիչների հետ էլ եմ հանդիպել»,- ասաց նա։
Սաղաթելյանը չհերքեց, որ հունիսի 27-ին հանդիպել է «Պատիվ ունեմ» դաշինքը գլխավորող Արթուր Վանեցյանի հետ։ Սաղաթելյանի խոսքով`քաղաքական հարցեր չեն քննարկել։
«Կիրակնօրյա հանդիպում է եղել` առանց քաղաքական օրակարգի։ Սա Վանեցյանի հետ առաջին հանդիպումը չէր»,- նշեց նա։
Նշենք՝ լրատվամիջոցներում տեղեկություն էր հայտնվել, որ Սևանի հյուրանոցներից մեկում, որն, ըստ մամուլի, պատկանում է «Հայաստան» դաշինքի երկրորդ համար, դաշնակցական Իշխան Սաղաթելյանին, կայացել է վերջինիս հանդիպումը «Պատիվ ունեմ» դաշինքի վարչապետի թեկնածու Արթուր Վանեցյանի հետ:
Վերլուծելու են սխալները. Ռոբերտ Քոչարյանի գլխավորած դաշինքը համագումար կանցկացնի
Ըստ լրատվամիջոցոցների` Վանեցյանը Իշխան Սաղաթելյանին իբր առաջարկել է միանալ իրենց թիմին, քանի որ «Ռոբերտ Քոչարյանի շուրջ հավաքված թիմը ոչ մի հեռանկար չունի»։