ԵՐԵՎԱՆ, 23 հունիսի – Sputnik.ՀՀ առողջապահական և աշխատանքի տեսչական մարմինը հորդորում է խմելու ջրի համային և գունային հատկությունների փոփոխությունների, տեսանելի նստվածքների առկայության դեպքում այն չօգտագործել կամ օգտագործել միայն եռացնելուց հետո, ինչպես նաև դիմել համապատասխան մարմիններին։ Տեսչական մարմինը նման հաղորդագրություն է տարածել` հաշվի առնելով, որ այսօր և առաջիկա 2 օրերին Արարատյան դաշտում, Արագածոտնի և Վայոց Ձորի նախալեռներում, ինչպես նաև Երևանում կանխատեսված ջերմաստիճանը +40, իսկ առանձին ցածրադիր հատվածներում մինչև +41 աստիճանի է հասնելու։
Տեսչական մարմինը կոչ է անում նաև խուսափել արևի ուղիղ ճառագայթներից` հատկապես 11:00-17:00 ընկած ժամանակահատվածում, հնարավորինս պաշտպանվել ուլտրամանուշակագույն ճառագայթումից` դնել գլխարկ, արևային ակնոց, դուրս գալ հովանոցով, հագնել բաց գույնի, բամբակյա կտորից, ազատ, օդաթափանց հագուստ։
«Պետք է ամենօրյա աշխատանքները հնարավորինս կատարել օրվա համեմատաբար զով ժամերին։ Բացի այդ, հետևել, որ օդափոխիչը կամ օդորակիչն ապահովում է օդափոխությունը, սակայն սառը օդի ուժեղ հոսանքն ուղղված չէ անմիջապես մարդկանց վրա»,–նշված է հաղորդագրության մեջ։
Տեսչական մարմինը հորդորում է հետևել ձեռքերի հիգիենային՝ հաճախակի լվանալ օճառով, չաղտոտել շրջակայքը, ջրամատակարարման և կոյուղու համակարգերում վթարներ ու անսարքություններ նկատելիս անհապաղ ահազանգել համապատասխան մարմիններին։ Բացի այդ, անհրաժեշտ է չթույլատրել երեխաներին լողալ դեկորատիվ ջրավազաններում և խաղալ ոռոգման ցանցի ջրով։
Հիշեցնենք` ԱԻՆ–ն ավելի վաղ հայտնել էր, որ պայմանավորված արաբական անապատներից արևադարձային տաք օդային հոսանքների ներթափանցմամբ` մինչև հունիսի 27-ը Հայաստանի ամբողջ տարածքում սպասվում է խիստ բարձր ջերմային ֆոն։
Ո՞ւմ համար է վտանգավոր սառը ջրով լողանալը. բացատրում է բժիշկը