ԵՐԵՎԱՆ, 21 հունիսի – Sputnik. ՀՀ վարչապետի պաշտոնակատար Նիկոլ Փաշինյանն իր թիմակիցների հետ այցելել է Եռաբլուր` հարգանքի տուրք մատուցելու պատերազմի զոհերի հիշատակին։
Փաշինյանին ուղեկցում են պաշտպանության նախարարի պաշտոնակատար Վաղարշակ Հարությունյանը, ՏԿԱԻ նախարար Սուրեն Պապիկյանը, ԱԺ փոխխոսնակ Ալեն Սիմոնյանը և այլ պաշտոնյաներ։ Նրանց այցը ուղիղ եթերով հեռարձակվում է Փաշինյանի ֆեյսբուքյան էջում։
Զոհերից մեկի մայրը մոտեցավ Փաշինյանին և ասաց` ուրախ է, որ հենց նրա կուսակցությունն է հաղթել։
«Իմ ցավը մի քիչ թեթևացավ, որ դուք մնացիք։ Ընտրություններին մասնակցել եմ. երեխաս որ կորցրի, չուզեցի ձեզ էլ կորցնեմ»,–ասում է կինը։
Այնուհետև ամուսիններ մոտեցան Փաշինյանին, շնորհավորեցին նրան ու ասացին, որ իրենք էլ են նրան ընտրել։
Փաշինյանը ծաղիկներ է խոնարհում պատերազմում զոհվածների շիրիմներին։
Հիշեցնենք` հունիսի 20–ին, ժամը 08։00–20։00–ն Հայաստանում քվեարկություն անցկացվեց 2008 ընտրատեղամասերում։ Ընտրողների ցուցակներում ընդգրկված 2 593 572 քաղաքացուց ընտրությանը մասնակցեցին 1 281 174–ը կամ 49.4 տոկոսը։
Արտահերթ խորհրդարանական ընտրություններին մասնակցում են 21 կուսակցություն և 4 դաշինք։
Կուսակցությունների համար անցողիկ շեմը 5 տոկոս է, դաշինքների համար՝ 7 տոկոս։
Ըստ օրենքի` եթե անցողիկ շեմը հաղթահարում են միայն երկու քաղաքական ուժ, ապա մանդատներ է ստանում նաև առավելագույն թվով ձայներ հավաքած երրորդ ուժը։
ԿԸՀ–ն արդեն ամփոփել է բոլոր 2008 ընտրատեղամասերի նախնական արդյունքները, որոնց համաձայն` «Քաղաքացիական պայմանագիր» կուսակցությունը ստացել է 687 251 քվե (53.92%), «Հայաստան» դաշինքը՝ 268 165 (21.04%), «Պատիվ ունեմ» դաշինքը՝ 66 633 (5.23%), «Բարգավաճ Հայաստան» կուսակցությունը՝ 50 419 (3.95), «Հանրապետություն» կուսակցությունը՝ 38 713 (3,04), «Հայ ազգային կոնգրես» կուսակցությունը՝ 19 674 (1.54), «Լուսավոր Հայաստան» կուսակցությունը` 15 557 (1.22)։
Ընտրություններին մասնակցել է ընտրողների 49.4%-ը. ամենաբարձր մասնակցությունը Սյունիքում է