Օրվա իշխանությունը ձախողել է մինչ օրս տված գրեթե բոլոր խոստումները, նախկիններն էլժամանակին ունեցած ռեսուրսներն ի նպաստ Հայաստանի չեն օգտագործել։ Sputnik Արմենիայի հետ զրույցում նման կարծիք հայտնեց «Ինքնիշխան Հայաստան» կուսակցության նախագահ, վարչապետի թեկնածու Դավիթ Սանասարյանը։
«Մենք քաղաքացիներին ասում ենք, որ դուրս գան այդ մոլորությունից, որ, ի դեմս «Ինքնիշխան Հայաստանի», ունեք այլընտրանք` սկզբունքային, պայքարող, տարիներ շարունակ փողոցում և տարբեր ճգնաժամային իրավիճակներում քաղաքացու կողքը կանգնած, քաղաքացուն ուղղորդած գործիչներ, մի թիմ, որի մեծ մասը եղել է և՛ Ապրիլյանի, և՛ 44-օրյայի ամենածանր կետերում։ Այս թիմի միջոցով կարող եք տեսնել ձեր ներկայությունը խորհրդարանում»,- ասաց նա։
Խորհրդարան անցնելու դեպքում Սանասարյանի թիմը Փաշինյանի և նախկին իշխանությունների հետ ճանապարհ գնալու, կոալիցիա կազմելու հավանականությունը բացառում է, բայց եթե արտաքին քաղաքական ոլորտում համախմբվելու անհրաժեշտություն լինի, որտեղ հարկ կլինի պաշտպանել Հայաստանի շահը, պատրաստ են կանգնել նաև ՀՀ երրորդ հանրապետության երբեմնի ղեկավարների կողքին։
«Մենք բացառում ենք ուղղակի համագործակցությունը հատկապես այն ուժերի հետ, որոնց դեմ տարիներ շարունակ կռիվ ենք տվել։ Ներկաներն էլ չեն կարողանում երկիր կառավարել։ Եթե Հայաստանի արտաքին քաղաքական շահը սպասարկող մի բան լինի, հնարավոր է` նրանց հետ էլ համագործակցենք, բայց ներքաղաքական գործընթացներում որևէ մեկի հետ հակված չենք որևէ գործողություն անել»,- նշեց Սանասարյանը։
Պետք է Ռուսաստանին զուգահեռ զարգացնել հարաբերությունները նաև Արևմուտքի հետ. Գասպարյան
Սանասարյանը պատմել է նաև քարոզարշավի ընթացքում տարբեր քաղաքական ուժերի կողմից կիրառվող մանիպուլյացիաների, Փաշինյանի հետ վերջին հանդիպման, իր նկատմամբ հարուցված քրեական գործի ընթացքի, բանակի կառուցվածքի փոփոխության, արցախյան հիմնահարցի կարգավորման, արտաքին համագործակցության վեկտորը փոխելու, նոր դաշնակիցներ ունենալու, ինչպես նաև սոցիալ-տնտեսական մարտահրավերներին դիմակայելու կուսակցության տեսլականի մասին։