ԵՐԵՎԱՆ, 15 հունիսի – Sputnik. Հայկական շախմատի առաջատար Լևոն Արոնյանը Ռումինիայի մայրաքաղաք Բուխարեստում ընթացող «Grand Chess Tour» շարքի մրցաշարում գրավեց երկրորդ տեղը:
Վերջին տուրում ոչ-ոքի խաղալով ադրբեջանցի գրոսմայստեր Թեյմուր Ռաջաբովի հետ՝ հայ շախմատիստը վաստակեց 5 միավոր: Նույն արդյունքով ավարտեցին նաև ռուսաստանցի Ալեքսանդր Գրիշչուկը և ամերիկացի Ուեսլի Սոն։
9 տուրի ընթացքում Արոնյանը տարավ երկու հաղթանակ, կրեց մեկ պարտություն և վեց խաղ ավարտեց ոչ-ոքի:
Հայ գրոսմայստերը հանդես էր գալիս Հայաստանի դրոշի ներքո։
Արոնյանը 2005 և 2017 թվականների աշխարհի գավաթակիր է, Հայաստանի հավաքականի կազմում 37-րդ, 38-րդ և 40-րդ համաշխարհային օլիմպիադաների, 2011 թվականի աշխարհի և 1999 թվականի Եվրոպայի թիմային առաջնությունների հաղթող, բազմաթիվ գերմրցաշարերի, ՖԻԴԵ-ի Մեծ մրցանակի, Վեյկ ան Զեյի մրցաշարի քառակի հաղթող (2007, 2008, 2012 և 2014), 2009 և 2013 թվականների Բիլբաոյում անցկացված «Մեծ սաղավարտի» հաղթող, արագ շախմատի 2009 թվականի աշխարհի չեմպիոն, 2006 և 2007 թվականներին Ֆիշերի շախմատի աշխարհի չեմպիոն, 2010 թվականի կայծակնային շախմատի աշխարհի չեմպիոն, 2002 թվականի Հայաստանի չեմպիոն։
«Արարատ-Արմենիան» նոր գլխավոր մարզիչ ունի