ԵՐԵՎԱՆ, 12 հունիսի - Sputnik. Քաղաքական ռեալիզմի դիրքերի վրա հաղթանակի հասնելու ու միջազգային նորմերի շրջանակներում ազգային շահը բարձրացնելու միակ թիմը ՀԱԿ-ն է։ Գյումրիում ընտրողներին ներկայացնելով իրենց ծրագրերը` այսպիսի հայտարարություն արեցին կուսակցության անդամները:
ՀԱԿ անդամների կարծիքով` այսօրվա համար ամենացավոտ` գերիների խնդիրը կլուծվի միայն բանիմաց ու խոսքի ուժ ունեցող ղեկավարի դեպքում:
«Վստահեցնում եմ՝ եթե Տեր-Պետրոսյանը լինի երկրի ղեկավար, մեկ շաբաթվա ընթացքում կլուծվի գերիների հարցը, մեկ շաբաթվա ընթացքում կլուծվի Մարալիկի քաղաքապետին անվստահություն հայտնելու և բազմաթիվ այլ հարցեր, որովհետև երկիր կառավարելը կրկես ու թամաշա չէ՝ լուրջ արվեստ է»,- նշեց ՀԱԿ փոխնախագահ Լևոն Զուրաբյանը։
Նա նշեց, որ ժամանակն է լրջանալու ու պետության այնպիսի ղեկավարներ ունենալու, որոնք կիմանան` ինչպես է պետք բանակցել ու նաև ապացուցել են, որ գիտեն բանակցել:
«Ի՞նչ է արել Նիկոլ Փաշինյանը գերիների վերադարձի համար: Պարզվում է՝ հրապարակավ առաջարկել է իր որդուն գերիների դիմաց, բացի այդ, նաև պաշտոնական նամակ էլ է գրել Ալիևին: Ինչպե՞ս պետք է վարվի, կամ ի՞նչ պետք է մտածի Ալիևը Նիկոլ Փաշինյանի կարողությունների մասին: Պետք է մտածի, որ Նիկոլ Փաշինյանն այդպես է բանակցում, իսկ դա ժողովրդի վրա տպավորություն թողնելու էժանագին հնարք է՝ մի քանի մարդու խաբելու: Այդ էժանագին շոուն վերածվում է պետական, պաշտոնական քաղաքականության: Նման բանակցող ունենալով` մենք երբևիցե գերիներին հետ կկարողանա՞նք բերել։ Բացառվում է»,- նշեց Զուրաբյանը։
Խոսելով երկրորդ նախագահի վերադարձի մասին՝ ՀԱԿ անդամները նշեցին, որ լուրջ խնդիր է այն, որ շատերը Ռոբերտ Քոչարյանին դիտարկում են որպես գործող իշխանությունից ազատվելու երկընտրանք:
Կան քաղաքական ուժեր, որոնք հատուկ շրջում և 3 սուտ են տարածում ԼՀԿ–ի մասին. Անի Սամսոնյան
«Մենք պետք ժողովրդին փրկենք երկընտրանքից։ Չկա՛ երկընտրանք։ Ո՛չ մեկը, ո՛չ մյուսը ընտրանք չեն մեզ համար: Երկուսն էլ չարիք են»,-նշեց նշեց ՀԱԿ փոխնախագահը:
ՀԱԿ ներկայացուցիչները գյումրեցիներին ևս մեկ անգամ խորհուրդ տվեցին ընտրել նրան, ում խոսքն աշխարհում ուժ ունի, ում հարգում են անգամ հակառակորդները:
Հիշեցնենք, որ Հայաստանում հունիսի 7–ից մեկնարկել է պաշտոնական քարոզարշավը։
Արտահերթ խորհրդարանական ընտրությունները տեղի են ունենալու հունիսի 20–ին։ Դրանց մասնակցում է 21 կուսակցություն և 4 դաշինք։
Փաշինյանը հունիսի 21-ին հրավիրում է Հանրապետության հրապարակ` իրենց հաղթանակը տոնելու