ԵՐԵՎԱՆ, 8 հունիսի - Sputnik. 2021 թվականի սկզբին բնակարանների վաճառքի ծավալն աճել էր, հիմա այն կրկին նվազել է։ Անշարժ գույքի կադաստրի պետական կոմիտեի վիճակագրությունը վկայում է, որ 2021 թվականի հունվարին Երևանում վաճառվել է 370 բնակարան, փետրվարին՝ 706, մարտին՝ 944 (այսինքն՝ գրեթե նախաճգնաժամային ցուցանիշների մակարդակի): Ապրիլին այդ ցուցանիշը փոքր-ինչ նվազել է ու կազմել 877, բայց այն մոտ 5 անգամ ավելի բարձր է, քան 2020 թվականի ապրիլին։
Անշարժ գույքի այլ տեսակների (մասնավոր տներ, արտադրական ու հասարակական շենքեր) հետ կապված գործարքներում մարտի համեմատ մի փոքր անկում է գրանցվել ինչպես Երևանում, այնպես էլ մարզերում:
Հնարավոր է՝ բնակարանների վաճառողները և գնորդները այս տարի են կատարել նախորդ տարվա իրադարձությունների պատճառով հետաձգված գործարքները։ Անշարժ գույքի պահանջարկի տվյալներն ավելի ճշգրիտ կարելի է ներկայացնել կիսամյակի արդյունքներով։
Ինչ վերաբերում է անշարժ գույքի գներին, ապա 2020 թվականի ապրիլի համեմատ դրանք հիմա դեռ մի քանի տոկոսով ցածր են (10%-ի սահմաններում)։ Այսպես, Երևանի կենտրոնում բնակարանների մեկ քառակուսի մետրի միջինը 610 հազար դրամ է (մոտ 1 170 դոլար), Արաբկիրում՝ 440 հազար (մոտ 850 դոլար)` նախկին 465 հազարի փոխարեն, Նորքում՝ 294 հազար (մոտ 565 դոլար)` նախկին 299 հազարի փոխարեն, Մալաթիա-Սեբաստիայում՝ 283,5 հազար (545)` նախկին 297 հազարի փոխարեն։
Պատերազմի հետևանքով կորսված անշարժ և շարժական գույքի համար պետական աջակցությունը կտրվի