ԵՐԵՎԱՆ, 5 հունիսի – Sputnik. Հայկական շախմատի առաջատար գրոսմայստեր Լևոն Արոնյանը մասնակցում է Ռումինիայի մայրաքաղաք Բուխարեստում մեկնարկած «Grand Chess Tour» շարքի նոր մրցաշարին:
Առաջին տուրում Արոնյանը սևերով ոչ–ոքի խաղաց ռումինացի գրոսմայստեր Կոնստանտին Լուպուլեսկուի հետ:
Մրցաշարը մեկնարկել է այսօր և կտևի մինչև հունիսի 15-ը: Արոնյանը հանդես է գալիս Հայաստանի դրոշի ներքո։
Բացի Արոնյանից, մրցաշարի առաջին տուրում հանդես կգան շախմատի աշխարհի չեմպիոնի նախկին հավակնորդ Ֆաբիանո Կարուանան (ԱՄՆ), Անիշ Գիրին (Հոլանդիա), Ալեքսանդր Գրիշչուկը (Ռուսաստան), Ուեսլի Սոն (ԱՄՆ), Շահրիար Մամեդյարովը, Թեյմուր Ռաջաբովը (երկուսն էլ՝ Ադրբեջան), Մաքսիմ Վաշյե–Լագրավը (Ֆրանսիա), Բոգդան-Դանիել Դյակը և Կոնստանտին Լուպուլեսկուն (երկուսն էլ ՝ Ռումինիա):
Արոնյանը 2005 և 2017 թվականների աշխարհի գավաթակիր է, Հայաստանի հավաքականի կազմում 37-րդ, 38-րդ և 40-րդ համաշխարհային օլիմպիադաների, 2011 թվականի աշխարհի և 1999 թվականի Եվրոպայի թիմային առաջնությունների հաղթող, բազմաթիվ գերմրցաշարերի, ՖԻԴԵ-ի Մեծ մրցանակի, Վեյկ ան Զեյի մրցաշարի քառակի հաղթող (2007, 2008, 2012 և 2014), 2009 և 2013 թվականների Բիլբաո-Մեծ սաղավարտի հաղթող, արագ շախմատի 2009 թվականի աշխարհի չեմպիոն, 2006 և 2007 թվականների Ֆիշերի շախմատի աշխարհի չեմպիոն, 2010 թվականի կայծակնային շախմատի աշխարհի չեմպիոն, 2002 թվականի Հայաստանի չեմպիոն։
Լևոն Արոնյանը հաղթել է աշխարհի չեմպիոնին