ԵՐԵՎԱՆ, 26 մայիսի - Sputnik. Ադրբեջանին, հնարավոր է, ինչ-որ մեկը դրդել է սադրանքի Սյունիքում և Գեղարքունիքում։ Այս մասին ՀՀ վարչապետի պաշտոնակատար Նիկոլ Փաշինյանն այսօր` մայիսի 26–ին, հայտարարեց ՀՀ ԱԺ–ում։
Փաշինյանի խոսքով ՝ դժվար թե Ադրբեջանը կարողանար ինքնուրույն և միայնակ գնալ նման քայլերի։
«Չգիտեմ, թե ում հետ է հենց Բաքուն համաձայնեցրել այդ քայլերը։ Ենթադրում եմ, որ Ադրբեջանը միայնակ չէր համարձակվի նման գործողությունների դիմել։ Կարծում եմ, որ դա արվել է այլ ուժերի հետ նախնական համաձայնությամբ։ Հենց որ մենք ավելի ճշգրիտ տեղեկատվություն ունենանք, կտեղեկացնենք», - նշեց նա։
Պատասխանելով պատգամավոր Տիգրան Ուրիխանյանի այն հարցին, թե արդյո՞ք Թուրքիան կարող էր կանգնել դրա հետևում, վարչապետի պաշտոնակատարը հայտարարեց, որ դա իր վարկածներից մեկն է։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Բացի այդ, մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կողմից արձակված կրակոցներից մահացու վիրավորում է ստացել զինծառայող, կրտսեր սերժանտ Գևորգ Խուրշուդյանը: