ԵՐԵՎԱՆ, 25 մայիսի – Sputnik. Ռուսաստանի հնարավորությունները չեն սահմանափակվում Հայաստանում զորքերի թվաքանակով, Sputnik Արմենիային ասել է ՌԴ Պետդումայի պատգամավոր, ԱՊՀ գործերի, եվրասիական ինտեգրման և հայրենակիցների հետ կապերի կոմիտեի առաջին փոխնախագահ, ԱՊՀ երկրների ինստիտուտի ղեկավար Կոնստանտին Զատուլինը՝ մեկնաբանելով Սյունիքում ռուսական զորքերի ուժեղացման հնարավորությունը։
«Հարցը մեր զինծառայողների թիվը չէ, այլ հենց նրանց ներկայության փաստը։ Այսպես ասած՝ դրոշի ցուցադրումը։ Ռուսաստանի հնարավորությունները չեն սահմանափակվում այս պահին Հայաստանում գտնվող զինծառայողների քանակական կազմով»,-ասաց Զատուլինը։
Նրա խոսքով, Հայաստանում Ռուսաստանի ներկայությունը ռազմակայանի մասին պայմանագրի հիման վրա, Ղարաբաղում խաղաղապահների առկայությունը նշանակում է, որ Մոսկվան ուշադիր հետևում է իրադարձություններին և անվտանգության երաշխավորն է, ինչպես և ՀԱՊԿ մյուս անդամները:
Ինչ վերաբերում է ՀԱՊԿ-ին դիմելուն, ապա այն խորհրդակցություններ է ենթադրում։ Հայաստանի կառավարությունը օգնություն չի խնդրել ագրեսիան հետ մղելու համար, որն այլ հոդվածով է ամրագրված։ Այժմ ՀԱՊԿ-ը կատարում է Հայաստանի իշխանությունների համապատասխան հարցումը։
Եթե իշխանությունը Սյունիք մտած թուրքի դեմ չի կռվում, ռուսը պիտի ասի՝ չէ, կռվե՞նք. Աբովյան
Զատուլինի խոսքով՝ Հայաստանի հետ ռազմական համագործակցություն եղել է, կա և կլինի։ Դա ենթադրվում է ստորագրված պայմանագրերով։ Միայն վերջին տարիներին մի քանի համաձայնագիր է ստորագրվել, որոնք վավերացվել են Պետդումայում։
«Ռուսաստանի և Հայաստանի միջև ռազմական համագործակցությունը զարգանալու է։ Բայց ռազմական համագործակցությունը երկրի հետ, որի կառավարությունն ի վիճակի չէ պաշտպանել ինքն իրեն, երբեք դրական արդյունքի չի բերում»,-նշեց Զատուլինը։
Նրա խոսքով, ոչ մի զենք, նույնիսկ ամենաժամանակակից զենքն ինքնին չի կրակում, և երկրի պաշտպանության ոչ մի հնարավորություն, օգնություն չի կարող արդյունավետ լինել, եթե համաձայնություն չկա հենց հայ հասարակության մեջ՝ Հայաստանում:
Ավելի վաղ ՀՀ վարչապետի պաշտոնակատար Նիկոլ Փաշինյանը հայտարարել էր, որ Հայաստանի հարավում՝ Ադրբեջանին և Իրանին սահմանակից Սյունիքի մարզում 102-րդ ռուսական ռազմակայանի երկու հենակետ է ստեղծվել:
Ադրբեջանցի զինվորականները մայիսի 12-ից գտնվում են ՀՀ Սյունիքի մարզի Սև լճի տարածքում՝ փորձելով ամրապնդել իրենց դիրքերն այստեղ հայկական տարածքների հաշվին: Նմանատիպ իրավիճակ է ստեղծվել Գեղարքունիքի մարզի Կութ գյուղի ուղղությամբ։
Այս ընթացքում ռուսական կողմի միջնորդությամբ բանակցությունների մի քանի փուլ է կայացել։
Հակառակորդը լքել է տարածքի մի մասը, սակայն լիովին հեռանալ չի շտապում։ Հայաստանը դիմել է ՀԱՊԿ-ին և Ռուսաստանից ռազմական օգնություն է խնդրել։ Միաժամանակ հայ զինվորականները լիակատար վերահսկողության տակ են վերցրել ադրբեջանական զորքերի մատակարարման ուղիները։ Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց պատրաստ է գործի դնել նաև ուժային տարբերակը, եթե բանակցությունները հաջողության չհասնեն։